জাকাৰ্টাত অনুষ্ঠিত হৈ থকা এছিয়ান গেইমছত মহিলাৰ ৪০০ মিটাৰৰ ব্যক্তিগত শাখাত ৰূপৰ পদক জিনা অসমৰ হিমা দাস আজি ৰাতিপুৱা অনুষ্ঠিত ২০০ মিটাৰৰ প্ৰাৰম্ভিক পৰ্যায়ৰ (হীটছ) দৌৰত ২৩.৪৭ ছেকেণ্ড সময় লৈ চতুৰ্থ স্থানত থাকে যদিও সময় মানৰ বিবেচনাত ছেমিত স্থান লাভ কৰে।
প্ৰাৰম্ভিক পৰ্যায়ৰ দৌৰত আশানুৰূপ প্ৰদৰ্শনত ব্যৰ্থ হ’লেও আজি বিয়লি ৫ বাজি ২০ মিনিটত অনুষ্ঠিতব্য ছেমি ফাইনেলত হিমাই পুনৰ শক্তিশালী ভূমিকাৰে অৱতীৰ্ণ হ’ব বুলি আশা কৰিছে।
উল্লেখ্য যে প্ৰাৰম্ভিক ৰাউণ্ডত চতুৰ্থ স্থানতে ক্ষান্ত থকা অসম কন্যা হিমাই ২০০ মিটাৰ দৌৰ সম্পূৰ্ণ কৰোতে ২৩.৪৭ ছেকেণ্ড লয় যদিও এইটো ইভেণ্টত তেওঁৰ ব্যক্তিগত শ্ৰেষ্ঠ সময় মান হ’ল ২৩.১০। সেয়ে হিমাই ছেমি ফাইনেলৰ দৌৰত আৰু অধিক উন্নতমানৰ প্ৰদৰ্শন আগ বঢ়াব বুলি ধাৰণা কৰিব পৰা যায়।
ইফালে হিমাই চলিত এছিয়ান গেইমছতে মহিলাৰ ৪০০ মিটাৰ ৫০.৭৯ ছেকেণ্ডত দৌৰ সামৰি নতুন ৰাষ্ট্ৰীয় অভিলেখ গঢ়ি দ্বিতীয় স্থানেৰে ৰূপৰ পদক লাভ কৰি দেশলৈ গৌৰৱ কঢ়িয়াই আনিবলৈ সক্ষম হৈছিল। সেয়ে ২০০ মিটাৰতো হিমাই নিজৰ সৰ্বোচ্চ উজাৰি দি অসমৰ লগতে দেশবাসীৰ মান উজলাই তুলিব বুলি সকলোৱে আশা কৰিছে।
উল্লেখযোগ্য যে অলপতে ফিনলেণ্ডত অনুষ্ঠিত বিশ্ব জুনিয়’ৰ এথলেটিকছ চেম্পিয়নশ্বিপত মহিলাৰ ৪০০ মিটাৰ দৌৰত স্বৰ্ণ জয় কৰি ইতিহাস সৃষ্টি কৰিছিল হিমা দাসে।
