হিণ্ডেনবাৰ্গৰ প্ৰতিবেদন প্ৰকাশ পাৱোৰা পিছত আদানী গ্ৰুপৰ শ্বেয়াৰ হ্ৰাস পোৱাৰ বাবে এল আই চিয়ে বৃহৎ লোকচানৰ সন্মুখীন হৈছে। আদানী গ্ৰুপৰ ৫ টা বৃহৎ কোম্পানীৰ অংশীদাৰিত্ব থকা ভাৰতীয় জীৱন বীমা নিগমৰ বজাৰ মূল্য প্ৰথমবাৰৰ বাবে ক্ৰয় মূল্যতকৈ নিম্নগামী হৈছে।
বৃহস্পতিবাৰে আদানী গ্ৰুপ কোম্পানীসমূহৰ (অম্বুজা চিমেণ্ট আৰু এচিচি বাদ দি) এলআইচিৰ অংশীদাৰিত্বৰ বজাৰ মূল্য ২৬,৮৬১.৯ কোটি টকা আছিল, যিটো ক্ৰয় মূল্য ৩০,১২৭ কোটি টকাতকৈ প্ৰায় ১১ শতাংশ কম।
উল্লেখ্য, আদানী গ্ৰুপৰ কোম্পানীসমূহৰ ভিতৰত এল আই চি হৈছে সৰ্ববৃহৎ ঘৰুৱা শ্বেয়াৰহোল্ডাৰ। ২০২২ চনৰ ডিচেম্বৰলৈকে আদানী বন্দৰত ৯.১৪ শতাংশ, আদানী গেছত ৫.৯৬ শতাংশ, আদানি এণ্টাৰপ্ৰাইজত ৪.২৩ শতাংশ, আদানি ট্ৰেন্সমিছনত ৩.৬৫ শতাংশ আৰু আদানী সেউজ শক্তিৰ ১.২৮ শতাংশ এল আই চিৰ অংশীদাৰিত্ব আছিল।
২০২২ চনৰ ডিচেম্বৰলৈকে বিগত ৯ টা ত্ৰৈমাসিকত বীমা কোম্পানীটোৱে আদানী গ্ৰুপ কোম্পানীসমূহৰ শ্বেয়াৰ ধাৰাবাহিকভাৱে অধিগ্ৰহণ কৰিছিল। ২০২০ চনৰ ছেপ্টেম্বৰৰ পৰা তালিকাভুক্ত আদানী গ্ৰুপৰ সাতটা কোম্পানীৰ ভিতৰত চাৰিটা কোম্পানীত এল আই চিয়ে অংশীদাৰিত্ব দ্ৰুত গতিত বৃদ্ধি কৰিছিল।
আমেৰিকা যুক্তৰাষ্ট্ৰৰ হিণ্ডেনবাৰ্গ ৰিচাৰ্ছে আদানী গ্ৰুপে ষ্টক মাৰ্কেটত বিত্তীয় জালিয়াতিৰ আশ্ৰয় লোৱাৰ অভিযোগ উত্থাপন কৰি এক প্ৰতিবেদন প্ৰকাশ কৰাৰ পিছতে বিগত প্ৰায় এমাহ ধৰি আদানী গ্ৰুপৰ কোম্পানীসমূহৰ শ্বেয়াৰ ক্ৰমাগতভাৱে হ্ৰাস পাই আহিছে।
আদানী গোটৰ ৯ টা তালিকাভুক্ত কোম্পানীৰ বজাৰ মূলধন বৃহস্পতিবাৰে ৬১ শতাংশ হ্ৰাস পাই ৭,৩৬,৬৭১ কোটি টকা হয়, যিটো প্ৰতিবেদন প্ৰকাশৰ এদিন পূৰ্বে ২৪ জানুৱাৰীত ১৯.১৮ লাখ কোটি টকা আছিল।
বিৰোধীয়ে হিণ্ডেনবাৰ্গ ৰিচাৰ্চ প্ৰতিবেদনত এল আই চিৰ বিনিয়োগ আৰু আদানী গ্ৰুপৰ বেংক এক্সপ’জাৰৰ বিষয়ে উদ্বেগ প্ৰকাশ কৰাৰ পিছত এল আই চিয়ে ৩০ জানুৱাৰীত এক বিবৃতি প্ৰকাশ কৰি আশংকা দূৰ কৰাৰ চেষ্টা কৰিছিল।
এল আই চিয়ে বিবৃতিটোত ‘আদানী গ্ৰুপৰ সকলো কোম্পানীৰ অধীনত বছৰ বছৰ ধৰি ক্ৰয় কৰা ইকুইটিৰ মুঠ ক্ৰয় মূল্য ৩০,১২৭ কোটি টকা আৰু ২০২৩ চনৰ ২৭ জানুৱাৰীত বজাৰ বন্ধৰ সময়ত ইয়াৰ বজাৰ মূল্য ৫৬,১৪২ কোটি টকা’ হোৱা বুলি উল্লেখ কৰিছিল।
