দেশত ভিন্ন মতৰ প্ৰতি অসহিষ্ণুতা বৃদ্ধিৰ সমান্তৰালভাৱে হিন্দুত্ববাদী সংগঠনবোৰৰ দ্বাৰা সংবাদ মাধ্যমৰ বাক স্বাধীনতাকো ৰঙা চকু দেখুওৱাৰ ঘটনা ক্ৰমাৎ বৃদ্ধি পাবলৈ ধৰিছে।
আজি শিৱসাগৰত হিন্দুত্ববাদী সংগঠন “হিন্দু জাগৰণ মঞ্চ”ৰ একাংশ গুণ্ডাই সংবাদ সংগ্ৰহ কৰিবলৈ যোৱা সাংবাদিকক মাৰিবলৈ চোঁচা লোৱাৰ ঘটনাই এই উদ্বেগজনক ছবিখন অধিক প্ৰকট কৰি তুলিছে।
শিৱসাগৰ নগৰখনত থকা জিলাৰ উপায়ুক্তৰ কাৰ্য্যালয়ৰ সন্মুখত আজি হিন্দুত্ববাদী সংগঠনটোৱে এন আৰ চি প্ৰক্ৰিয়াটোৰ বিৰুদ্ধে প্ৰতিবাদ কৰিছিল।
সংগঠনটোৰ মতে, উচ্চতম ন্যায়ালয়ৰ পৰ্যবেক্ষণত চলি থকা এন আৰ চিৰ কাম ভুলকৈ চলিছে আৰু লগতে এন আৰ চিত লাখ লাখ অবৈধ নাগৰিকৰ নাম অন্তৰ্ভুক্ত হৈছে। গতিকে তেওঁলোকে উপায়ুক্তৰ কাৰ্য্যালয়ৰ সন্মুখত বহি প্ৰতিবাদ কৰে।
কিন্তু সংবাদ সংগ্ৰহৰ বাবে প্ৰতিবাদস্থলীলৈ যোৱা সাংবাদিকে হোজাই সমষ্টিৰ বিধায়ক শিলাদিত্য দেব ১৯৭১ চনৰ ২৫ মাৰ্চৰ পাছত অসমলৈ অহা বুলি বিভিন্ন সময়ত বাতৰি প্ৰচাৰ হৈ অহাৰ কথাটো উনুকিয়াই এই সন্দৰ্ভত জানিব বিচৰাতে খৰ্গহস্ত হৈ পৰে সংগঠনটোৰ নেতাসকল।
তাত উপস্থিত একাংশ বিজেপি নেতাৰ উচটনিত কেইজনমানে সাংবাদিকলৈ চোঁচা লৈ আক্ৰমণ কৰিবলৈ উদ্যত হয়।
সাংবাদিকে কৰা প্ৰশ্নৰ উত্তৰ দিব নোৱাৰি এইদৰে গুণ্ডাগিৰিৰে সাংবাদিকলৈ চোঁচা লোৱাত পৰিস্থিতিটো উত্তপ্ত হৈ পৰে। পিছত পৰিস্থিতি নিয়ন্ত্ৰণলৈ আহে যদিও সংবাদ মাধ্যমক এইদৰে ৰঙা চকু দেখুৱাব খোজা কাৰ্য্যক গৰিহণা দিছে শিৱসাগৰৰ ৰাইজে।
উল্লেখযোগ্য যে বিজেপিৰ বিফলতা, হিন্দুত্বৰ নামত গুণ্ডাগিৰি, মাতব্বৰিতা, দেশৰ বৰ্ধিত অহিষ্ণুতা আদিৰ বিষয়ে প্ৰশ্ন কৰিলেই “হিন্দুত্বৰ ৰক্ষক” এই তথাকথিত সংগঠনবোৰ জাঙুৰ খাই উঠাটো এটা পৰম্পৰাত পৰিণত হৈছে।
আজি যদিও হিন্দু জাগৰণ মঞ্চৰ নামত প্ৰতিবাদী কাৰ্যসূচীটো হৈছিল, প্ৰতিবাদকাৰীসকলৰ বেছি সংখ্যকেই আছিল বিজেপিৰ নেতা-কৰ্মী। বিজেপিৰ ৰাজ্যিক সভাপতি ভবেন্দ্ৰ নাথ মহন, ৰাজ্যিক সদস্যদ্বয় প্ৰাঞ্জল কটকী আৰু অশ্বিনী চেতিয়া, শিৱসাগৰ জিলা বিজেপিৰ সাধাৰণ সম্পাদক আৰু লগতে দলটোৰ বহু নেতা-কৰ্মী উপস্থিত আছিল।
