হাইস্কুল শিক্ষান্ত আৰু হাইমাদ্ৰাছাৰ বিশেষ পৰীক্ষাৰ ফলাফল আজি ঘোষণা কৰা হ’ব। এক বিবৃতি যোগে এই কথা সদৰী কৰিছে ছেবাই।
ক’ভিদকালীন পৰিস্থিতিৰ বাবে হাইস্কুল শিক্ষান্ত আৰু হাইমাদ্ৰাছাৰ পৰীক্ষা নপতাকৈ ফলাফল ঘোষণা কৰাৰ পিছত ৰাজ্যত ফলাফলক লৈ অসন্তুষ্টি প্ৰকাশ কৰা ছাত্ৰ–ছাত্ৰীক লৈ বিশেষ পৰীক্ষা অনুষ্ঠিত কৰা হৈছিল।
১ অক্টোবৰৰ পৰা ১১ অক্টোবৰলৈ ৰাজ্যত হাইস্কুল শিক্ষান্ত আৰু হাই মাদ্ৰাছাৰ বিশেষ পৰীক্ষা অনুষ্ঠিত হৈছিল।
এই বিশেষ পৰীক্ষাৰ ফলাফল আজি ঘোষণা কৰা হ’ব বুলি প্ৰকাশ কৰিছে শিক্ষা বিভাগে। ছেবাৰ সচিব সুৰঞ্জনা সেনাপতিয়ে মঙলবাৰে জানিবলৈ দিয়া মতে, বুধবাৰে ঘোষিত হ’ব লগা HSLC-হাই মাদ্ৰাছা বিশেষ পৰীক্ষাৰ ফলাফল ছেবাৰ sebaonline.org ৱেবছাইটত উপলব্ধ হ’ব।
শিক্ষা বিভাগে জানিবলৈ দিয়া মতে, পৰীক্ষাৰ্থীয়ে ছেবাৰ ৱেবছাইটৰ পৰা ডাউনলোড কৰিব পাৰিব মাৰ্কশ্বীট।
উল্লেখ্য যে,ক’ভিদ মহামাৰীৰ দোহাই দি এইবছৰ অসম চৰকাৰে ৰাজ্যত হাইস্কুল শিক্ষান্ত পৰীক্ষা আৰু হাই মাদ্ৰাছা পৰীক্ষা বাতিলৰ নিৰ্দেশ দিছিল আৰু বিকল্প মূল্যাঙ্কণ পদ্ধতিৰ আধাৰত যোৱা ৩০ জুলাইত ফলাফল ঘোষণা কৰা হৈছিল।
স্মৰ্তব্য যে, উক্ত ফলাফলত যিসকল ছাত্ৰ-ছাত্ৰী সন্তুষ্ট হোৱা নাছিল তেওঁলোকৰ বাবে ছেবাই বিশেষ পৰীক্ষা অনুষ্ঠিত কৰিছিল।
