ছিপাঝাৰৰ প্ৰাক্তন বিধায়ক বিনন্দ শইকীয়াই মঙলবাৰে বিজেপিৰ পৰা পদত্যাগ কৰিছে। এসময়ত মুখ্যমন্ত্ৰী হিমন্ত বিশ্ব শৰ্মাৰ ঘনিষ্ঠ সহযোগী হিচাপে কাম কৰা শইকীয়াই বুধবাৰে সংবাদমেলযোগে এই সিদ্ধান্তৰ কথা ঘোষণা কৰে।
শইকীয়াই কয় যে বিগত চাৰি বছৰে বিজেপিৰ লগত থাকিলেও মুখ্যমন্ত্রী হিমন্ত বিশ্ব শর্মা আৰু কেন্দ্রীয় মন্ত্রী সর্বানন্দ সোণোৱালৰ বৈঠকত নিয়মীয়াকৈ অংশগ্রহণ কৰিও তেওঁ দলৰ পৰা একো লাভ কৰা নাছিল৷
‘বিজেপিয়ে নিজকে জাতীয়তাবাদী বুলি কয় যদিও জাতীয়তাবাদী কাম-কাজ কৰাত ব্যৰ্থ হৈছে।
দলটোক আৰু অধিক সমালোচনা কৰি তেওঁ দাবী কৰে যে এসময়ত “আমি উৎকোচ নলওঁ, আনকো ল’বলৈও নিদিওঁ” শ্লোগান দিয়া বিজেপি নিজেই জল জীৱন মিছন আঁচনিৰ অধীনত ধনৰ অপব্যৱহাৰকে ধৰি দুৰ্নীতিৰ সৈতে জড়িত হৈ পৰিছে।
সাম্প্ৰদায়িক উত্তেজনা সৃষ্টিৰ বাবে গাহৰিৰ মাংস, গৰুৰ মাংস পেলোৱাৰ দৰে ঘটনাই বিজেপিৰ প্ৰকৃত স্বৰূপ প্ৰতিফলিত কৰে বুলিও তেওঁ দলটোক সমালোচনা কৰে। তেওঁ কয় যে এনে দলৰ লগত মই কাম কৰিব নোৱাৰো।
জানিব পৰা মতে, ছিপাঝাৰৰ মানুহে ২০২৬ চনৰ নিৰ্বাচনত তেওঁ প্ৰতিদ্বন্দ্বিতা কৰাটো বিচাৰে। কিন্তু, যিহেতু তেওঁ এতিয়া বিজেপি এৰিছে, সেয়েহে তেওঁ স্বতন্ত্ৰভাৱে নিৰ্বাচনত অৱতীৰ্ণ হ’ব নে আন দলীয় বেনাৰত নিৰ্বাচনত অৱতীৰ্ণ হ’ব সেই কথা এতিয়ালৈকে জানিব পৰা নাই। ইফালে, ইয়াৰ পূৰ্বে কংগ্ৰেছ ত্যাগ কৰি বিজেপিত যোগদান কৰা বিনন্দ শইকীয়াই এতিয়া পুনৰ কংগ্ৰেছলৈ যোৱাৰ সিদ্ধান্ত লৈছে বুলি চৰ্চা চলিছে।
