প্ৰাক্তন ভাৰতীয় ক্ৰিকেটাৰ তথা বৰ্তমান লোকসভাৰ সদস্য গৌতম গম্ভীৰে পাকিস্তানী বলাৰ মহম্মদ ইৰফানৰ বিৰুদ্ধে সহজভাৱে বেটিং কৰিব পৰা নাছিল। এই ভাষ্য দিছে খোদ বাওঁহতীয়া বলাৰ ইৰফানে।
পাকিস্তানৰ এটা টিভি চেনেলক দিয়া সাক্ষাতত ইৰফানে ২০১২ চনৰ দ্বিপাক্ষিক শৃংখলাটোৰ কথা মনত পেলাই কয় যে ভাৰতৰ অপেনাৰ বেটছমেন গম্ভীৰে উক্ত শৃংখলাটোত মোৰ বল খেলিবলৈ ভয় কৰিছিল।
ভাৰতত হোৱা উক্ত শৃংখলাটোত গম্ভীৰক দুবাৰ আউট কৰাৰ কথা উল্লেখ কৰি ইৰফানে কয় যে শৃংখলাটোৰ পাছত গম্ভীৰ সীমিত অভাৰৰ ক্ৰিকেটত ভাৰতীয় দলত বেছি দিনলৈ নাথাকিল।
৭ ফুট ১ ইঞ্চি ওখ ইৰফানে সাক্ষাৎকাৰটোত কয়, ‘ভাৰতৰ বিৰুদ্ধে খেলাৰ সময়ত গম্ভীৰ মোৰ বিৰুদ্ধে সহজ হ’ব পৰা নাছিল। সেই শৃংখলাটোত অংশ লোৱা কিছু ক্ৰিকেটাৰে মোৰ ওখ শৰীৰৰ কাৰণে গম্ভীৰে মোৰ বল সহজে অনুমান কৰিব পৰা নাছিল বুলি কৈছিল’।
উক্ত শৃংখলাটোত আগবঢ়োৱা হতাশাজনক প্ৰদৰ্শনৰ বাবেই গম্ভীৰৰ বগা বলৰ কেৰিয়াৰ সমাপ্ত হৈছিল বুলি দাবী কৰে পাকিস্তানী বলাৰজনে। তদুপৰি ইৰফানে কয়, ‘গম্ভীৰে মোৰ মুখামুখি হ’ব বিচৰা নাছিল’।
