ওড়িশাৰ কালাহাণ্ডি জিলাৰ অতিৰিক্ত জিলা দণ্ডাধীশ (ADM) ধিমন চাকমা নামৰ এজন ৩০ বছৰীয়া আইএএছ বিষয়া চাকৰি আৰম্ভ কৰাৰ মাত্ৰ ৪ বছৰৰ ভিতৰতে দুৰ্নীতি আৰু উৎকোচ গ্ৰহণৰ অভিযোগ উত্থাপিত হৈছে ।
এজন স্থানীয় ব্যৱসায়ীয়ে অভিযোগ উত্থাপন কৰি কয় যে ধিমনে তেওঁৰ পৰা ২০ লাখ টকা উৎকোচ হিচাপে দাবী কৰিছিল। টকা নিদিলে বিভিন্ন ধৰণৰ হাৰাশাস্তিৰ সন্মুখীন হ’ব বুলি ভাবুকিও প্ৰদান কৰিছিল।
দুটা কিস্তিত টকা দিবলৈ চুক্তি হোৱা অনুসৰি, ব্যৱসায়ীজনে প্ৰথম কিস্তি হিচাপে ১০ লাখ টকা লৈ দেওবাৰে আইএএছ বিষয়াৰ চৰকাৰী বাসগৃহলৈ যায়। যেতিয়া ধিমনে টকাখিনি গ্ৰহণ কৰি ড্ৰয়াৰৰ ভিতৰত ৰাখে, ঠিক সেই সময়তে ওড়িশা ভিজিলেন্স বিভাগৰ বিষয়াসকলে অভিযান চলাই তেওঁক উৎকোচ লোৱাৰ সময়তে হাতে লুটে ধৰা পৰে বিষয়া গাৰাকী।
তাৰপিছত বাসগৃহখনত চলোৱা অভিযানত উদ্ধাৰ হয় আন ৪৭ লাখ টকাৰ নগদ ধন। মুঠ উদ্ধাৰ হোৱা ধনৰ পৰিমাণ হয় ৫৭ লাখ টকা। ধনৰ উৎস সম্পৰ্কে ধিমনে কোনো সন্তোষজনক উত্তৰ দিব নোৱাৰিলে।
উল্লেখযোগ্য যে, ধিমন চাকমাই ২০২১ চনত আইএএছ নিযুক্তি লাভ কৰিছিল আৰু কেৱল ৪ বছৰৰ চাকৰিতেই ইমান বিপুল ধনৰ কেলেংকাৰীত জড়িত হৈ পৰে। তেওঁৰ বিৰুদ্ধে দুৰ্নীতি নিবাৰক আইন, ১৯৮৮ অনুসৰি গোচৰ ৰুজু কৰা হৈছে আৰু তদন্ত অব্যাহত আছে।
