হিমা দাস, ৰিয়ান পৰাগৰ দৰে স্বনামধন্য ক্ৰীড়াবিদৰ পথকে অনুসৰণ কৰি আন্তঃৰাষ্ট্ৰীয় পৰ্যায়ত পুণৰ্বাৰ অসমৰ নাম উজলালে গোৱালপাৰা জিলাৰ কৃষ্ণাইৰ যুৱ খেলুৱৈ ইনামূল হকে। উত্তৰ প্ৰদেশত অনুষ্ঠিত হৈ থকা “২য় আন্তঃৰাষ্ট্ৰীয় কাৰাটে চেম্পিয়নশ্বিপ ২০১৯” শীৰ্ষক ক্ৰীড়া প্ৰতিযোগিতাত আজি কৃষ্ণাইৰ শাকোমুৰি নিবাসী ইনামূল হকে ৪৯ কেজি শাখাত সোণৰ পদক অৰ্জনেৰে ৰাজ্যবাসীলৈ এই গৌৰৱ কঢ়িয়াই আনিবলৈ সক্ষম হয় ৷
কাৰাটে এচ’ছিয়েশ্যন অৱ ইণ্ডিয়া (কাই)ৰ দ্বাৰা অনুমোদিত সংস্থা “অল ভাৰত চোটোকান কাৰাটে-ডু ফেডাৰেশ্য’ন”ৰ উদ্যোগত তথা ভাৰত চৰকাৰৰ যুৱ আৰু ক্ৰীড়া মন্ত্ৰালয়ৰ তত্বাৱধানত উত্তৰ প্ৰদেশৰ চাহাৰানপুৰত ২৬ এপ্ৰিলৰ পৰা তিনিদিনীয়া কাৰ্যসূচীৰে অনুষ্ঠিত প্ৰতিযোগিতাখনিত ইনামূল হকে আজি এই সন্মান আঁজুৰি আনে ৷
ভাৰতৰ লগতে এই আন্তঃৰাষ্ট্ৰীয় কাৰাটে প্ৰতিযোগিতাখনিত বাংলাদেশ, নেপাল, শ্ৰীলংকা, আফগানিস্তান আৰু ম্যানমাৰৰ যুৱ খেলুৱৈ সকলে অংশগ্ৰহণ কৰে। উল্লেখ্য যে কৃতী খেলুৱৈ ইনামূল হক কৃষ্ণাই আৰক্ষী থানাৰ অন্তৰ্গত শাকোমুৰি গাৱঁৰ মহিবুল হক আৰু ছপিজান বিবিৰ সুযোগ্য সন্তান ৷
স্থানীয় হালোৱা সংগ্ৰাম সমিতিৰ সহঃ সম্পাদক ইনামূলৰ সাফল্যত হালোৱা সংগ্ৰাম সমিতিৰ সভাপতি আনোৱাৰ হুছেইন,সম্পাদক মফিজুল ইছলাম,৩৭ নম্বৰ গোৱালপাৰা পূব বিধান সভা সমষ্টিৰ বিধায়ক এ কে ৰশিদ আলম, এআইয়ুডিএফৰ নেতা আবুল কালাম হুছেইন তথা কৃষ্ণাই উন্নয়ন খণ্ডৰ ভাৰপ্ৰাপ্ত খণ্ড উন্নয়ন বিষয়া কবিতা ডেকাকে ধৰি জিলাখনৰ বিভিন্ন দল সংগঠনে শুভেচ্ছা জ্ঞাপন কৰিছে।
