বাংলাদেশৰ মংলা বন্দৰেৰে ত্ৰিপুৰালৈ ২০ খন এল পি জি বুলেট ট্ৰাক চলাচল কৰিব দিয়া সন্দৰ্ভত ভাৰত আৰু বাংলাদেশে এখন পাৰস্পৰিক সহযোগিতা পত্ৰত স্বাক্ষৰ কৰে।
ত্ৰিপুৰাত ক্ৰমবৰ্ধমান পেট্ৰ’লজাত সামগ্ৰীৰ চাহিদাৰ প্ৰতি লক্ষ্য ৰাখি মংলা বন্দৰৰ ব্যৱহাৰৰ গুৰুত্বপূৰ্ণ হ’ব। ৰাজ্য চৰকাৰে ৰাজ্যখনত যাতে কোনোকাৰণতে পেট্ৰ’লজাত সামগ্ৰীৰ যোগান হ্ৰাস নহয় সেই দিশত কাৰ্য্যব্যৱস্থা হাতত লৈছে।
জানিব পৰা মতে ত্ৰিপুৰা চৰকাৰে ৰাজ্যখনত পেট্ৰ’ল আৰু ডিজেল ভাণ্ডাৰৰ ক্ষমতা ৪০০ কিলোলিটাৰ পৰা ২০৫০ কিলোলিটাৰ কৰাৰ বাবে কাম কৰি আছে লগতে গেছ চিলিণ্ডাৰৰ উৎপাদন ক্ষমতাও বৃদ্ধি কৰাৰ বাবে পৰিকল্পনা গ্ৰহণ কৰিছে।
ত্ৰিপুৰাৰ বিভিন্ন প্ৰান্তত প্ৰায় ১৫০ টা পেট্ৰ’ল পাম্প আৰু এল পি জি যোগান কেন্দ্ৰ স্থাপন কৰাৰ বাবে চৰকাৰে সিদ্ধান্ত গ্ৰহণ কৰিছে।
ভাৰত আৰু বাংলাদেশে ২০১৮ চনৰ অক্টোবৰত দুয়োখন দেশৰ মাজত সামগ্ৰী আমদানি, ৰপ্তানিৰ বাবে চিতাগং আৰু মংলা বন্দৰৰ ব্যৱহাৰকে ধৰি তিনিখন চুক্তিত স্বাক্ষৰ কৰিছিল।
চিতাগং আৰু মংলা বন্দৰক দক্ষিণ ত্ৰিপুৰাৰ সৈতে সংযোগ কৰি নিৰ্মাণ কৰি থকা ফেনী নদীৰ ওপৰৰ ‘মৈত্ৰী সেতু’য়ে ত্ৰিপুৰাক লাভান্বিত কৰিব বুলি ত্ৰিপুৰাৰ ৰাজ্যপাল কপ্তান সিং চোলাংকিয়ে কয়।
আনহাতে, কেন্দ্ৰ চৰকাৰে ত্ৰিপুৰাক বাংলাদেশৰ সৈতে জলপথেৰে সংযোগ কৰাৰ ক্ষেত্ৰত লোৱা সিদ্ধান্তক ঐতিহাসিক আখ্যা দি ৰাজ্যপাল চোলাংকিয়ে এই সিদ্ধান্তই ভাৰত আৰু বাংলাদেশৰ মাজত ব্যৱসায়, বাণিজ্য বৃদ্ধি কৰিব বুলি আশা ব্যক্ত কৰে।
