এখন খেল বাকী থকা অৱস্থাতে শংখলা জয়। দেওবাৰে অষ্ট্ৰেলিয়াৰ বিৰুদ্ধে তিনিখন খেলৰ এদিনীয়া শৃংখলাত ভাৰতে ২-০ ব্যৱধানত অগ্ৰগতি লাভ কৰে। মোহালীত প্ৰথমখন এদিনীয়া খেলত জয়লাভ কৰাৰ পিছত দেওবাৰে ইন্দোৰত অষ্ট্ৰেলিয়াক বৃহৎ ব্যৱধানত পৰাস্ত কৰে টীম ইণ্ডিয়াই।
এছিয়া কাপ জয় কৰাৰ পিছত অষ্ট্ৰেলিয়াৰ বিৰুদ্ধে শৃংখলা জয়ে বিশ্বকাপৰ আগতে ভাৰতীয় দলৰ মনোবল দুগুণ বৃদ্ধি কৰিব।
দেওবাৰে প্ৰথম বেটিং কৰি ভাৰতে ৫ উইকেটত ৩৯৯ ৰান সংগ্ৰহ কৰে। বিজয়ৰ বাবে চাৰিশ ৰানৰ লক্ষ্য অনুসৰণ কৰি অষ্ট্ৰেলিয়াই আৰম্ভণিতে দুটা উইকেট হেৰুৱাইছিল। তাৰ পাছত বৰষুণৰ বাবে কিছু সময়ৰ বাবে খেল বন্ধ হৈ থকাৰ বাবে ডাকৱৰ্থ-লুইছৰ নিয়মৰ অধীনত অষ্ট্ৰেলিয়াক ৩৩ অভাৰত ৩১৭ ৰানৰ নতুন টাৰ্গেট দিয়া হয়। কিন্তু ২৮.২ অভাৰতে অন্ত পৰিল অষ্ট্ৰেলিয়াৰ ইনিংছ।
মেচখনত ভাৰতে ৯৯ ৰানত জয়লাভ কৰে। স্বাভাৱিকতে অষ্ট্ৰেলিয়াই দ্ৰুত ৰান সংগ্ৰহ কৰিবলৈ গৈ একেৰাহে উইকেট হেৰুৱাইছিল। ডেভিদ ৱাৰ্নাৰে একমাত্ৰ ৰান লাভ কৰিছিল। দলৰ অ’পেনাৰগৰাকীয়ে ১টা ছয় আৰু ৭টা চাৰিৰ সহায়ত ৩৯টা বলত ৫৩ ৰান সংগ্ৰহ কৰে।
প্ৰসিদ্ধ কৃষ্ণৰ প্ৰথমটো বলত শূন্য ৰানত উভতি যায় ষ্টিভ স্মিথ। মাৰ্নাছ লাবুচেনে ২৭ ৰান সংগ্ৰহ কৰে। কিন্তু শ্বেন এবটে সকলোকে অতিক্ৰম কৰিলে। দলটোৰ ৮টা উইকেট যোৱাৰ পাছত এটা দুৰ্দান্ত ইনিংছ খেলে। ২৯টা বলত তেওঁ পঞ্চাশ ৰাণ সম্পূৰ্ণ কৰে। ৫টা ছয় আৰু ৪টা চাৰিৰ সহায়ত ৩৬টা বলত ৫৪ ৰান সংগ্ৰহ কৰি আউট হয় এবটে। অষ্ট্ৰেলিয়াৰ পেচাৰগৰাকীৰ ৰান বাদ দিলে স্মিথৰ দলটোৱে লাজতেই পৰিলেহেঁতেন। ৰাষ্ট্ৰীয় দললৈ ঘূৰি অহাৰ পাছত ৰবিচন্দ্ৰন অশ্বিনে তিনিটা উইকেট দখল কৰে। ৰবীন্দ্ৰ জাদেজায়ো তিনিজনক আউট কৰে।
এইখন মেচত কামিন্সৰ সলনি দলক নেতৃত্ব দিয়া ষ্টিভ স্মিথে টছত জয়ী হৈ ভাৰতক বেটিং কৰিবলৈ পঠায়। সুযোগৰ ব্যৱহাৰ কৰি ভাৰতে অষ্ট্ৰেলিয়াৰ বিৰুদ্ধে এদিনীয়া ক্ৰিকেটত সৰ্বাধিক ৰান সংগ্ৰহ কৰে। ইয়াৰ পূৰ্বে বাংগালুৰুত ৩৮৩ ৰান কৰিছিল। দেওবাৰে টীম ইণ্ডিয়াই ৩৯৯ ৰান সংগ্ৰহ কৰে। তাৰ ভিতৰত আছিল দুটাকৈ শতৰাণ আৰু অৰ্দ্ধ শতৰাণ।
শতক অৰ্জন কৰে শ্ৰেয়াছ আয়াৰ (১০৫) আৰু শুভমন গীলে (১০৪)। আঘাতৰ পৰা সুস্থ হৈ উঠাৰ পাছত শ্ৰেয়াছে এক সুন্দৰ ইনিংছ খেলিলে। এদিনীয়া ক্ৰিকেটত তেওঁৰ এইটো তৃতীয়টো শতক। আনহাতে, এই বছৰটোত গীলৰ পঞ্চমটো শতক।
আনহাতে, কে এল ৰাহুল (৫২) আৰু সূৰ্য্যকুমাৰ যাদৱ (৭২)ৰ অৰ্দ্ধ শতৰাণ। শেষত সূৰ্যৰ বিধ্বংসী বেটিঙেৰে ভাৰতে প্ৰায় ৪০০ ৰান সংগ্ৰহ কৰে। অষ্ট্ৰেলিয়াৰ বাবে পৰ্বত সমান ৰান অতিক্ৰম কৰি জয়ী হোৱাটো ক্ষমতাৰ বাহিৰত আছিল। বুধবাৰে অষ্ট্ৰেলিয়াৰ বিৰুদ্ধে ভাৰতৰ শৃংখলাৰ অন্তিমখন তথা নিয়মৰক্ষাৰ মেচ আছে।
