ভাৰতত চীনৰ এপছ নিষিদ্ধকৰণৰ সমান্তৰালভাৱে লাডাখ সীমান্ত দুই দেশৰ সেনা বাহিনীৰ ক’ৰ কামাণ্ডাৰ স্তৰৰ তৃতীয় বৈঠক আজি আৰম্ভ হৈছে।
মঙলবাৰৰ দুপৰীয়াৰ পৰা আৰম্ভ হোৱা এই বৈঠকত লেহস্থিত ১৪ নং ক’ৰৰ কামাণ্ডাৰ লেফ্টেনেন্ট জেনেৰেল হৰেন্দ্ৰ সিং আৰু দক্ষিণ জিনজিয়াং মিলেটাৰী ডিষ্ট্ৰিক কামাণ্ডাৰ মেজৰ জেনেৰেল লিও লিনে অংশগ্ৰহণ কৰিছে।
উল্লেখ্য যে, ১৫ জুনৰ ৰক্তক্ষয়ী সংঘৰ্ষৰ পিছত যোৱা ২২ জুনত দুই পক্ষৰ সেনা বিষয়াৰ মাজত ১১ ঘণ্টীয়া বৈঠক অনুষ্ঠিত হৈ যায়।
উক্ত বৈঠকত ১৫ জুনৰ পিছত প্ৰকৃত সীমান্ত ৰেখাত বৃদ্ধি পোৱা উত্তেজনা নিৰশনৰ বাবে ভাৰতৰ তৰফৰ পৰা কিছু প্ৰস্তাৱ দিয়া হৈছিল।
বৈদেশিক মন্ত্ৰালয়ৰ সূত্ৰৰ অনুসৰি দুয়োপক্ষই সেনা পিছুৱাই নিয়া, এলএচিত সেনাৰ সংখ্যা কমোৱা আৰু আন্তঃগাঠনি নিৰ্মাণ ও সেনা শিবিৰ স্থাপন বন্ধ ৰখাৰ প্ৰস্তাৱ দিয়া হৈছিল।
চীনৰ পক্ষৰ পৰা এই প্ৰস্তাৱসমূহত সঁহাৰি জনোৱা হৈছিল বুলি প্ৰকাশ পাইছিল।
কিন্তু ইয়াৰ পিছতো দেখা গৈছে চীনে লাডাখ সীমান্তৰ এলএচিৰ পৰা সেনা পিছুৱাই নিয়া নাই।
বিভিন্ন বিদেশী সংস্থাৰ উপগ্ৰহীয় ছবিত ২২ জুনৰ পিছতো গালৱান উপত্যকাসহ পূৱ-লাডাখৰ বিভিন্ন অঞ্চলত চীনা সৈন্যৰ সংখ্যা বৃদ্ধি কৰা দেখা গৈছে।
আনকি উক্ত অঞ্চলবোৰত চীনা পক্ষই বাংকাৰ আৰু সেনা শিবিৰ স্থাপন কৰাও দেখা গৈছে।
চৰকাৰী সূত্ৰৰ মতে এসপ্তাহৰ পূৰ্বে গালৱানৰ সমীপত লাডাখৰ গোগৰা হট স্প্ৰিং, পাংগং হ্ৰদৰ উত্তৰে ফিঙ্গাৰ এৰিয়াৰ ৪ৰ পৰা ৮ পৰ্যন্ত ভাৰতীয় ভূখণ্ডত চীনা সৈন্যই প্ৰৱেশ কৰি অৱস্থান কৰিছে।
দৌলত বেগ উল্ডিৰ বায়ুসেনাৰ ঘাটিৰ দক্ষিণে দেপচাং উপত্যকাৰ এলএচিৰ পৰা প্ৰায় ডেৰ কিলোমিটাৰ ভিতৰলৈ চীনা সৈন্যৰ সোমাই আহিছে বুলিও প্ৰকাশ পাইছে।
আজিৰ দুই পক্ষৰ সেনাৰ বৈঠকত ভাৰতীয় পক্ষই এইবোৰ বিষয় উত্থাপন কৰাৰ সম্ভাৱনা আছে।
