প্ৰথম টেষ্টত পৰাজয়ৰ গ্লানি; ইয়াৰ পিছতে ঘটিল ৰাজকীয় প্ৰত্যাৱৰ্তন। ক্ৰিকেট বিশ্বত চমক তোলা ইংলেণ্ডৰ বাজবল শৈলীৰ ওপৰত বিস্তাৰ কৰিলে আধিপত্য। আৰু দুৰন্ত প্ৰদৰ্শনেৰে আজি অন্তিম টেষ্টত ইনিংছ ব্যৱধানত জয়েৰে ৪-১ ব্যৱধানত শৃংখলা দখল কৰিলে ভাৰতে।
ধৰমশালাত শৃংখলাৰ পঞ্চম তথা অন্তিম টেষ্টত আজি তৃতীয় দিনাই এক ইনিংছ আৰু ৬৪ ৰাণত জয়ী হয় ঘৰুৱা দল ভাৰত। কেৰিয়াৰৰ শততম টেষ্ট খেলা অভিজ্ঞ তাৰকা ৰবিচন্দ্ৰন অশ্বিনৰ স্পীন ঘূৰ্ণীৰ পিছতে বুমৰাহ, জাদেজা আৰু কুলদীপে ধৰাশায়ী কৰে ইংৰাজ বাহিনীক।
কালি দ্বিতীয় দিনাৰ স্ক’ৰ ৮ উইকেটত ৪৭৩ ৰাণৰ পৰা আজি ইনিংছ আৰম্ভ কৰি মাত্ৰ চাৰি ৰাণ যোগ দিয়েই ৪৭৭ ৰাণত ইনিংছ সমাপ্ত কৰে আৰু ইংলেণ্ডৰ প্ৰথম ইনিংছৰ স্ক’ৰ ২১৮তকৈ ২৫৯ ৰাণৰ বিশাল অগ্ৰগতি লাভ কৰে। কালিৰ দুই অপৰাজিত বেটাৰ কুলদীপ আৰু বুমৰাহে ক্ৰমে ৩০ আৰু ২০ ৰাণ সংগ্ৰহ কৰি বিদায় লয়।
ইফালে এনে বৃ্হৎ ব্যৱধানৰ হেঁচা লৈ দ্বিতীয় ইনিংছ আৰম্ভ কৰা ইংলেণ্ডক প্ৰাৰম্ভিক অৱস্থাতে বিপৰ্যয়ৰ মুখলৈ ঠেলি দিয়ে অশ্বিনে। মাত্ৰ দুই ৰাণৰ স্ক’ৰত ডাকেটক আৰু ২১ ৰাণৰ স্ক’ৰত আনজন অপেনাৰ ক্ৰলীক অশ্বিনে পেভিলিয়নৰ পথ দেখুৱায়।
স্বকীয় বাজবল শৈলীৰে প’পে (১৯) ইনিংছ আগবঢ়াই নিয়াৰ চেষ্টা কৰিলেও ৩৬ ৰাণৰ স্ক’ৰত অশ্বিনে প’পকো বিদায় দি ইংৰাজ শিবিৰত আন এক আঘাত হানে। অৱশ্যে চতুৰ্থ উইকেটত ৰুট আৰু বেয়াৰষ্ট’ৱে ৫৬ ৰাণ যোগ দি দলীয় স্ক’ৰ ৯২ লৈ আগবঢ়াই নিয়ে।
আক্ৰমণাত্মক বেটিঙেৰে বেয়াৰষ্ট’ই কিছুসময় ভাৰতীয় বলিং লাইন আপক সমস্যাত পেলালেও কুলদীপে বেয়াৰষ্ট’ৰ (৩৯) উইকেট দখল কৰি এই চিন্তা দূৰ কৰে। ব্যৰ্থ হয় অধিনায়ক ষ্ট’কছ (২) আৰু ফ’কছ (৮)। এই দুই খেলুৱৈৰ উইকেট দখল কৰি অশ্বিনে ইনিংছটোত পাঁচ উইকেট সম্পূৰ্ণ কৰে।
১১৩ ৰাণতে ৬ টাকৈ উইকেট হেৰুৱাই নিশ্চিত পৰাজয়ৰ গ্ৰাসত পৰা দলটোক সাময়িক সকাহ দি ৰুটে আৰু হাৰ্টলীয়ে ১৪১ ৰাণলৈ আগবঢ়াই নিলেও বুমৰাহে হাৰ্টলীক (২০) বিদায় দি এই যুটীও ভংগ কৰে। একেটা অভাৰতে মাৰ্ক উডো (০) বুমৰাহৰ চিকাৰ হয়।
নৱম উইকেটত ৰুট আৰু বাছিৰ (১৩)ৰ মাজত যোগ হয় ৪৮ ৰাণৰ। অৱশ্যে দুই স্পিনাৰ জাদেজা আৰু কুলদীপে অন্তিম দুটা উইকেট দখল কৰি ইংলেণ্ডৰ দ্বিতীয় ইনিংছ ১৯৫ ৰাণত অৱসান ঘটায়। তাৰ মাজতে ৰুটে অকলেই যুঁজ দি ৮৪ ৰাণৰ এক দৰ্শনীয় ইনিংছ খেলে।
টেষ্টখনৰ প্ৰথম ইনিংছত ৫টা আৰু দ্বিতীয় ইনিংছত দুটা উইকেটৰ লগতে বেটিঙতো ৩০ ৰাণ সংগ্ৰহ কৰা কুলদীপ যাদৱক মেচৰ শ্ৰেষ্ঠ খেলুৱৈ হিচাপে বিবেচনা কৰা হয়। আনহাতে তিনিটা অৰ্ধশতক আৰু দুটা দ্বিশতকেৰে সৰ্বমুঠ ৭১২ ৰাণ সংগ্ৰহেৰে শৃংখলাটোত উজলি উঠা যশস্বী জয়ছোৱাল শৃংখলাৰ শ্ৰেষ্ঠ বিবেচিত হয়।
