কোভিডৰ দক্ষিণ আফ্ৰিকাৰ প্ৰজাতি অমিক্ৰনৰ সংক্ৰমণ অব্যাহত আছে দেশত । দেশত অমিক্ৰনত মুঠ আক্ৰান্তৰ সংখ্যা ৪২ জনলৈ বৃদ্ধি পালে।
আজি ৰাজস্থানত চাৰিজন লোক নতুনকৈ অমিক্ৰনত আক্ৰান্ত বুলি নিশ্চিত হোৱাৰ পিছতে দেশৰ অমিক্ৰনত আক্ৰান্ত ৰোগীৰ সংখ্যা ৪২ জন হ’লগৈ।
জয়পুৰৰ জ্যেষ্ঠ স্বাস্থ্য বিষয়া নৰোত্তম শৰ্মাই প্ৰকাশ কৰা মতে আজি অমিক্ৰনত আক্ৰান্ত চাৰি জন লোককে ধৰি ৰাজস্থানত আক্ৰান্ত মুঠ ৰোগীৰ সংখ্যা ১৩ গৰাকী হ’ল।
ৰাজধানী চহৰ নতুন দিল্লীতো অব্যাহত আছে অমিক্ৰনৰ সংক্ৰমণ। অমিক্ৰনত আক্ৰান্ত এজন লোকক দিল্লীৰ এলএনজেপি হাস্পতালত ভৰ্তি কৰোৱা হৈছিল । আক্ৰান্ত লোক জন তাঞ্জানিয়াৰ পৰা ঘূৰি আহিছিল বুলি জানিব পৰা গৈছে।
বিশ্বৰ ৫৭ খন দেশত ত্ৰাসৰ সৃষ্টি কৰিছে কোভিডৰ দক্ষিণ আফ্ৰিকাত উৎপত্তি ঘটা অমিক্ৰনে।
কৰ্ণাটকত প্ৰথমবাৰৰ বাবে দুজন লোকৰ দেহত ধৰা পৰিছিল মাৰাত্মক অমিক্ৰন ভাইৰাছৰ উপস্থিতি।
কোভিডৰ এই ভাইৰাছ বিধত আক্ৰান্ত দুয়োগৰাকী লোকেই কৰ্ণাটকৰ আৰু লোক দুজনৰ বয়স ক্ৰমে ৬৬ আৰু ৪৬ বছৰ।
ভাৰতত প্ৰথমে অমিক্ৰনত আক্ৰান্ত দুয়োজন লোকেই দক্ষিণ আফ্ৰিকাৰ লোক।
ব্যৱসায় সম্পৰ্কীয় কামত তেওঁলোকে কৰ্ণাটকলৈ আহিছিল। লোক দুজনে ১১ নৱেম্বৰ আৰু ২০ নৱেম্বৰত বাংগালুৰুত উপস্থিত হৈছিল।
দক্ষিণ আফ্ৰিকাৰ লোক দুজনৰ লক্ষণসমূহ কিছু ভিন্ন বুলি কৰ্ণাটকৰ স্বাস্থ্যমন্ত্ৰী কে সুধাকৰে প্ৰকাশ কৰিছিল।
পৰীক্ষা কৰোৱাৰ অন্তত তেওঁলোক কোভিডৰ অমিক্ৰন প্ৰজাতিত আক্ৰান্ত বুলি নিশ্চিত কৰা হৈছিল।
কোভিডৰ এই নতুন প্ৰজাতি বিধৰ নাম ৰখা হৈছে বি ১.১.৫২৯ বুলি। এই ভাইৰাছবিধ বষ্টৱানা আৰু হংকঙতো শেহতীয়াকৈ পোৱা গৈছে।
