ভূমিকম্পই বিধ্বস্ত কৰি তোলা তুৰস্কলৈ সাহায্য প্ৰেৰণ কৰিব ভাৰতে। প্রধানমন্ত্রী নৰেন্দ্র মোদীয়ে তুৰস্কক সম্ভৱপৰ সকলো সাহায্য আগবঢ়োৱা হ’ব বুলি ঘোষণা কৰাৰ পিছত চৰকাৰে NDRF বাহিনীৰ অনুসন্ধান আৰু উদ্ধাৰ দল, চিকিৎসা দল আৰু সাহায্য সামগ্রী তুৰস্কলৈ প্রেৰণ কৰাৰ সিদ্ধান্ত লয়৷
প্ৰকাশিত এক চৰকাৰী বিবৃতিত উল্লেখ কৰা মতে প্ৰধানমন্ত্ৰী মোদীৰ প্ৰধান সচিব পি কে মিশ্ৰই দক্ষিণ ব্লকত এখন বৈঠক অনুষ্ঠিত কৰি তাৎক্ষণিক সাহায্য ব্যৱস্থাৰ বিষয়ে আলোচনা কৰে আৰু এই বৈঠকতে সিদ্ধান্ত লোৱা হয়।
বিশেষভাৱে প্ৰশিক্ষিত কুকুৰৰ দল আৰু প্ৰয়োজনীয় সা-সামগ্ৰীসহ ১০০ জনীয়া এনডিআৰএফৰ দুটা দল ভূমিকম্পত ক্ষতিগ্ৰস্ত অঞ্চললৈ অনুসন্ধান আৰু উদ্ধাৰ অভিযানৰ বাবে বিমানেৰে প্ৰেৰণ কৰিবলৈ সাজু কৰা হৈছে।
প্ৰশিক্ষিত চিকিৎসক আৰু অত্যাৱশ্যকীয় ঔষধ, পেৰামেডিকেলৰ সৈতে চিকিৎসা দলসমূহো তুৰস্কলৈ প্রেৰণৰ বাবে সাজু কৰি ৰখা হৈছে বুলি বিবৃতিটোত উল্লেখ কৰা হৈছে।
বিবৃতিটোত লগতে তুৰ্কী চৰকাৰ আৰু আংকাৰাত থকা ভাৰতৰ দূতাবাস আৰু ইস্তানবুলত থকা কনছুলেট জেনেৰেল কাৰ্যালয়ৰ সমন্বয়ত সাহায্য সামগ্ৰী প্ৰেৰণ কৰা হ’ব বুলি জানিবলৈ দিয়া হৈছে।
আজি অনুষ্ঠিত হোৱা বৈঠকত কেবিনেট সচিব, এনডিএমএ আৰু এনডিআৰএফৰ উপৰি গৃহ পৰিক্ৰমা, প্ৰতিৰক্ষা, বৈদেশিক পৰিক্ৰমা, অসামৰিক বিমান পৰিবহণ, স্বাস্থ্য আৰু পৰিয়াল কল্যাণ মন্ত্ৰালয়ৰ প্ৰতিনিধি উপস্থিত থাকে বুলি বিবৃতিটোত উল্লেখ কৰা হৈছে।
উল্লেখ্য যে, আজি পুৱতি নিশা ছিৰিয়াৰ সীমান্তৱৰ্তী দক্ষিণ তুৰস্কত সৃষ্টি হোৱা ৭.৮ ৰিখটাৰৰ শক্তিশালী ভূমিকম্পৰ ফলত সহস্ৰাধিক লোকৰ মৃত্যু এইপৰ্যন্ত নিশ্চিত কৰিছে প্ৰশাসনে। কৰ্তৃপক্ষই লগতে মৃতকৰ সংখ্যা বৃদ্ধি পোৱাৰ সম্ভাৱনা ব্যক্ত কৰিছে।
আমেৰিকাৰ ভূতাত্ত্বিক জৰীপৰ তথ্য অনুসৰি দক্ষিণ তুৰস্কত ৭.৮ ৰিখটাৰ স্কেলৰ শক্তিশালী ভূমিকম্পটোৰ পিছতে ৬.৭ প্ৰাবল্যৰ আন এক প্ৰবল ভূমিকম্পৰো উদ্ভৱ হয়।
প্ৰাৰম্ভিক ভূমিকম্পটো গাজিয়ানেপ প্ৰদেশৰ নুৰদাগি চহৰৰ পৰা ২৬ কিলোমিটাৰ পূবে ১৭.৯ কিলোমিটাৰ গভীৰতাত সৃষ্টি হোৱাৰ বিপৰীতে দ্বিতীয়টো কিছু সময় পিছতে মধ্য তুৰস্কত ৯.৯ কিলোমিটাৰ গভীৰতাত উদ্ভৱ হয়।
