চীন-পাকিস্তানৰ সৈতে ভাৰতৰ অহি-নকুল সম্পৰ্কৰ পিছতো ভাৰতে এইবাৰ দেশ দুখনৰ সেনাৰ সৈতে একেলগে সামৰিক প্ৰশিক্ষণ গ্ৰহণৰ বাবে সাজু হৈছে।
যি ভাৰতীয় সেনাক চীন আৰু পাকিস্তানৰ সেনাই চকুৰ কূটা দাঁতৰ শাল বুলি ভাবি আহিছে সেই ভাৰতীয় সেনাৰেই কান্ধত কান্ধ মিলাই প্ৰশিক্ষণ ল’ব দেশ দুখনৰ সেনাই।
কথাষাৰ শুনিবলৈ খাঁজে-খাপে নিমিলা যেন লাগিছে যদিও ভাৰতে চীন আৰু পাকিস্তানৰ সেনাৰ সৈতেই সামৰিক প্ৰশিক্ষণত অংশ ল’ব।
ৰাছিয়াৰ আস্ট্ৰাখান নামৰ অঞ্চলটোত হ’বলগীয়া কাভকাজ-২০২০ সামৰিক প্ৰশিক্ষণ কাৰ্যসূচীত ভাৰত,চীন পাকিস্তান আদি দেশৰ লগতে বিশ্বৰ আন বহু কেইখন দেশে অংশগ্ৰহণ কৰিব।
চলিত বৰ্ষৰ ১৫ৰ পৰা ২৬ ছেপ্তেম্বৰলৈ চলিব লগীয়া এই সামৰিক প্ৰশিক্ষণ কাৰ্যসূচীত বৈৰিতা পাহৰি ভাৰতে চীন আৰু পাকিস্তানৰ সেনাৰ সৈতে সন্মিলিত সামৰিক প্ৰশিক্ষণত অংশ ল’ব।
ভাৰতৰ এনে সিদ্ধান্তক ছ’চিয়েল মিডিয়াত বহুজনে সমালোচনাও কৰা দেখা গৈছে।
জানিব পৰা মতে এই সামৰিক প্ৰশিক্ষণত ভাৰতৰ তিনিওটা প্ৰতিৰক্ষা বাহিনীৰ প্ৰায় ২০০ বিষয়া-জোৱানে অংশগ্ৰহণ কৰিব।
ৰাছিয়াই প্ৰতি বছৰে বিশ্বৰ বিভিন্ন দেশৰ সেনাৰ মাজত এনে ধৰণৰ সামৰিক প্ৰশিক্ষণ কাৰ্যসূচী গ্ৰহণ কৰি আহিছে।
