সোমবাৰে অনুষ্ঠিত হোৱা ফিফাৰ ২০১৯ বৰ্ষৰ শ্ৰেষ্ঠ ফুটবলাৰ নিৰ্বাচনত অনুষ্ঠানত আৰ্জেন্টিনাৰ বিশ্বপ্ৰসিদ্ধ ফুটবলাৰ তথা বাৰ্চিলোনাৰ ষ্টাইকাৰ লিয়োনেল মেছিয়ে নেডাৰলেণ্ডৰ ভাৰ্জিল ভান ডিজক পাছ পেলাই শ্ৰেষ্ঠ ফুটবলাৰৰ সন্মান অৰ্জন কৰিবলৈ সক্ষম হয়।
মেছিয়ে ভোটিঙত মুঠ ৪৬ পইণ্ট পোৱাৰ বিপৰীতে ভাৰ্জিল ভান ডিজকে লাভ কৰে ৩৮ পইণ্ট।
এইক্ষেত্ৰত ৩৬ টা ভোটেৰে তৃতীয় স্থানত থাকে পৰ্টুগালৰ তাৰকা ফুটবলাৰ ক্ৰিষ্টিয়ানো ৰোণাল্ডো।
উল্লেখযোগ্য যে, ফিফাৰ বৰ্ষশ্ৰেষ্ঠ ফুটবলাৰ নিৰ্বাচনৰ সময়ত ফিফাৰ স্বীকৃতিপ্ৰাপ্ত ফুটবল খেলা দেশ সমূহৰ অধিনায়ক আৰু প্ৰশিক্ষকে এটাকৈ ভোট দিয়াৰ অধিকাৰ থাকে আৰু ইয়াৰ ভিত্তিতে শ্ৰেষ্ঠ ফুটবলাৰ গৰাকীক নিৰ্বাচন কৰা হয়।
২০১৯ চনৰ ফিফাৰ শ্ৰেষ্ঠ ফুটবলাৰ নিৰ্বাচনৰ সময়ত ভাৰতীয় ফুটবল দলৰ অধিনায়ক সুনীল ছেত্ৰী আৰু প্ৰশিক্ষকে ভোট দান কৰে।
সুনীল ছেত্ৰীয়ে ভোটিং প্ৰক্ৰিয়াত ২০১৯ বৰ্ষৰ বিশ্বশ্ৰেষ্ঠ ফুটবলাৰ লিয়োনেল মেছিক ভোট নিদি নেডাৰলেণ্ডৰ ফুটবলাৰ ভাৰ্জিল ভান ডিজকৰ সপক্ষেহে নিজৰ ভোটদান সাব্যস্ত কৰিছিল।
আনহাতে, ভাৰতীয় ফুটবল দলৰ প্ৰশিক্ষক ইগৰ ষ্টিমাকে এই ক্ষেত্ৰত ক্ৰিষ্টিয়ানো ৰোণাল্ডোক ভোট দিয়ে।
