Chessable Masters: দবাৰ বিশ্ব চেম্পিয়ন কাৰ্লচেনক পুনৰ পৰাস্ত কৰিলে ১৬ বছৰীয়া ভাৰতীয় প্ৰজ্ঞানন্দে!

দবাৰ বিশ্ব চেম্পিয়ন মেগনাছ কাৰ্লচেনক এটা বছৰতে দুবাৰকৈ পৰাস্ত কৰিলে ১৬ বছৰীয়া ভাৰতীয় কিশোৰ প্ৰজ্ঞানন্দ ৰমেশবাবুয়ে।

দুয়োজনে চেছেবল মাষ্টাৰ্ছ অনলাইন ৰেপিড দবা প্ৰতিযোগিতাৰ পঞ্চম ৰাউণ্ডত মিলিত হৈছিল। খেলখন ড্ৰ’ৰ দিশে আগবাঢ়িছিল। কিন্তু ৪০ তম মুভত নৰৱেৰ কাৰ্লছেনে ডাঙৰ ভুল পেলালে। ক’লা হাতীটো ভুল ঠাইত ৰাখিলে। ভাৰতীয় গ্ৰেণ্ডমাষ্টাৰে এই সুযোগটোৰ সুবিধালৈ বিশ্ব চেম্পিয়নক পৰাস্ত কৰে।

লগতে পঢ়ক: Elon Musk in Sex Controversy: এলন মাস্কৰ বিৰুদ্ধে যৌন নিৰ্যাতনৰ বিস্ফোৰক অভিযোগ; বিমানত সেই যুৱতীৰ সৈতে কি ঘটিছিল?

এই জয়েৰে প্ৰজ্ঞানন্দে নকআউট পৰ্যায়ত প্ৰৱেশ কৰাৰ সম্ভাৱনা বৰ্তাই ৰাখিলে। কাৰ্লচেনক পৰাজিত কৰাৰৰ পিছত তেওঁৰ মুঠ পইণ্ট হৈছে ১২। কিন্তু জিকিলেও নিজৰ খেলত মুঠেই সুখী নহয় প্ৰজ্ঞানন্দ। খেলখনৰ শেষত তেওঁ কয়, “মই এনেদৰে জিকিব নিবিচাৰো।‘’

ইপিনে, পৰাজিত হৈও কাৰ্লচেন দ্বিতীয় স্থানত আছে। এক নম্বৰ স্থানত আছে চীনৰ ৱেই ই। ১৬ জনীয়া এই প্ৰতিযোগিতাখনত বিশ্বৰ আটাইতকৈ কনিষ্ঠ গ্ৰেণ্ডমাষ্টাৰ অভিমন্যু মিশ্ৰইও অংশগ্ৰহণ কৰিছে।

উল্লেখ্য যে চলিত বছৰৰ ফেব্ৰুৱাৰী মাহত প্ৰজ্ঞানন্দে এয়াৰথিংছ মাষ্টাৰ্ছ নামৰ আন এখন প্ৰতিযোগিতাত কাৰ্লচেনক পৰাস্ত কৰিছিল। তেওঁ একেৰাহে তিনিখন মেচ জিকা নৰৱেৰ বিস্ময়কৰ প্ৰতিভা কাৰ্লচেনক ক’লা গুটিৰে ১৯ টা চালত পৰাস্ত কৰিছিল।