হাংঝু এছিয়ান গেমছৰ প্ৰথমখন খেলে ভাৰতীয় ক্ৰীড়াপ্ৰেমীৰ বাবে কঢ়িয়াই আনিলে ভাল খবৰ। দ্বিতীয় দিনা ভাৰতীয় ভলীবল দলে এটা বৃহৎ অঘটন ঘটায়। গ্ৰুপ পৰ্যায়ত তিনিবাৰৰ চেম্পিয়ন দক্ষিণ কোৰিয়াক পৰাস্ত কৰাৰ লগতে নক আউট পৰ্যায়ৰ টিকট নিশ্চিত কৰে।
উল্লেখ্য যে ইয়াৰ পূৰ্বে ভাৰতে তেওঁলোকৰ মেচত কম্বোডিয়ান দলক পৰাস্ত কৰিছিল। ফলত পাঁচ পইণ্টেৰে শীৰ্ষৰ পৰা নক আউট পৰ্যায়লৈ যোৱাটো নিশ্চিত কৰে। এইটো এছিয়ান গেমছৰ এতিয়ালৈকে ঘটা ডাঙৰ অঘটন বুলি ক’ব পাৰি। বুধবাৰে ভাৰতীয় ভলীবল দলটোক অভূতপূৰ্ব ৰূপত দেখা যায়। যোৱাবাৰৰ ৰূপৰ পদক বিজয়ীক হৰুৱাই অঘটন ঘটালে ভাৰতীয় দলটোৱে।
ভাৰতৰ সপক্ষে গেম স্ক’ৰ ৩-২ (২৫-২৭,২৯-২৭,২৫-২২,২০-২৫ আৰু ১৭-১৫)। গ্ৰুপ-চিৰ এইখন আছিল ভাৰতৰ অন্তিমখন খেল। কঠিন যুঁজৰ মেচখনত তেওঁলোকে জয়লাভ কৰে। এই জয় নিশ্চিত কৰিবলৈ তেওঁলোকে ২ ঘন্টা ৩৮ মিনিট যুঁজিবলগীয়া হৈছিল।
মঙলবাৰে কম্বোডিয়াৰ বিৰুদ্ধে ভাৰতে প্ৰথমখন খেল খেলিছিল। সেই মেচখনত অৱশ্যে ভাৰতীয় ভলীবল খেলুৱৈসকলে এই মেচখনৰ দৰে কষ্ট কৰিবলগীয়া হোৱা নাছিল। সেই মেচত ভাৰতীয় দলটোৱে সহজ জয় লাভ কৰিছিল। কম্বোডিয়াক ৩-০ ছেটত পৰাস্ত কৰে।
একেৰাহে দুটা জয়ৰে নিজৰ গ্ৰুপৰ পৰা ৫ পইণ্ট সংগ্ৰহ কৰে ভাৰতে। সেইদিনা ভাৰতৰ হৈ অমিত গুলিয়া আৰু অশ্বৱাল ৰায় আছিল তাৰকা প্ৰদৰ্শক। খেলখনৰ গুৰুত্বপূৰ্ণ সময়ত ভাৰতৰ হৈ গুৰুত্বপূৰ্ণ পইণ্ট তেওঁলোকে কাঢ়ি আনিছিল। ভাৰতে তেওঁলোকৰ প্ৰদৰ্শনৰ ওপৰত নিৰ্ভৰ কৰি গুৰুত্বপূৰ্ণ মুহূৰ্তবোৰ তেওঁলোকৰ পক্ষত ঘূৰাই আনিবলৈ সক্ষম হৈছিল। ফলত দক্ষিণ কোৰিয়াৰ ভলীবলাৰসকলে কোনো সময়তে ভাৰতৰ হাতৰ পৰা খেলৰ ছিঙি নিব নোৱাৰিলে।
পৰৱৰ্তী ৰাউণ্ডত ভাৰতে কাৰ সৈতে খেলিব সেয়া এতিয়াও নিশ্চিত হোৱা নাই। অৱশ্যে পৰৱৰ্তী ৰাউণ্ডত ভাৰতে চীনৰ টাইপেই বা মংগোলিয়াৰ সৈতে খেলিব। এই মেচখনত জয়লাভ কৰিলে তেওঁলোকৰ কোৱাৰ্টাৰ ফাইনেল নিশ্চিত হ’ব। ভাৰতীয় ভলীবলৰ ইতিহাসত সেয়া হ’ব এক নজিৰবিহীন ঘটনা।
বহুদিন ধৰি ভাৰতীয় ভলীবলৰ পৰা কোনো পদক অহা নাই। শেষ পদক আহিছিল ১৯৮৬ চনৰ গেমছত। সেই বাৰ গেমছত ভাৰতীয় দলটোৱে ব্ৰঞ্জৰ পদক লাভ কৰিছিল। বিগত এছিয়ান গেমছত ভাৰতীয় দলৰ প্ৰদৰ্শন আছিল নিৰাশাজনক। ইণ্ডোনেছিয়াত তেওঁলোকে ১২ নম্বৰ স্থান দখল কৰিছিল। এইবাৰ ভাৰতীয় দলটোৱে স্বাভাৱিকতে ১৯৮৬ চনত লাভ কৰা পদকৰ ৰং সলনি কৰিবলৈ অধীৰ হৈ ৰৈছে।
