ইয়াৰ পূৰ্বে অলিম্পিকত পদক বিজয়ী মল্লযুঁজাৰুসকলে ভাৰতীয় মল্লযুঁজ ফেডাৰেচনৰ বিৰুদ্ধে এজাহাৰ দাখিল কৰিছিল। সেই বিবাদে দেশৰ উচ্চতম ন্যায়ালয় পাইছিল। যাৰ প্ৰতিক্ৰিয়া এতিয়াও মাৰ যোৱা নাই। এইবাৰ ভাৰতীয় বক্সিং ফেডাৰেচনৰ বিৰুদ্ধে অভিযোগৰ আঙুলি তুলিছে অলিম্পিক পদক বিজয়ী বক্সাৰে।
টকিঅ’ অলিম্পিকত ভাৰতৰ হৈ বক্সিঙত ব্ৰঞ্জৰ পদক লাভ কৰা অসমৰ বক্সাৰ লাভলিনা বৰগোহাঁইয়ে ভাৰতীয় বক্সিং ফেডাৰেচনৰ কাৰ্যবাহী সঞ্চালক অৱসৰপ্ৰাপ্ত কৰ্ণেল অৰুণ মালিকৰ বিৰুদ্ধে দুৰ্ব্যৱহাৰৰ অভিযোগ উত্থাপন কৰিছে। লাভলিনাই অভিযোগ কৰে যে অৰুণ মালিকে তেওঁৰ সৈতে অপমানজনক আৰু লিংগ বৈষম্যমূলক আচৰণ কৰিছিল।
২৭ বছৰীয়া বক্সাৰগৰাকীয়ে ২ পৃষ্ঠাৰ এক লিখিত অভিযোগ দাখিল কৰে। তাত লিখা আছে, “৮ জুলাইৰ জুম মিটিংৰ সময়ত কৰ্ণেল মালিকে মোৰ লগত অপমানজনক আৰু অসন্মানজনক আচৰণ কৰিছে।”
টাইমছ অফ ইণ্ডিয়াৰ সূত্ৰ অনুসৰি ইতিমধ্যে ইণ্ডিয়ান অলিম্পিক এছ’চিয়েশ্যনে তিনিজনীয়া তদন্ত সমিতি গঠন কৰি এই অভিযোগৰ তদন্ত আৰম্ভ কৰিছে। কমিটীত আছে ট’পছৰ চিইঅ’ নচত্তৰ সিং জোহাল, প্ৰাক্তন টেবুল টেনিছ খেলুৱৈ শৰৎ কমল আৰু এগৰাকী মহিলা অধিবক্তা।
লাভলিনাই ক্ৰীড়া মন্ত্ৰী মনসুখ মাণ্ডব্য, ছাই ডিজি ট’পছ, ভাৰতীয় অলিম্পিক সন্থা আৰু বক্সিং ফেডাৰেচনলৈ ২ পৃষ্ঠাৰ অভিযোগ পত্ৰ প্ৰেৰণ কৰিছে। তাত তেওঁ লিখিছে, “জুমৰ বৈঠকৰ পিছত মই গভীৰভাৱে আঘাত, দুখ আৰু হতাশ অনুভৱ কৰিলোঁ। মই ভাবিবলৈ আৰম্ভ কৰিলোঁ, আমি মহিলা খেলুৱৈসকল সঁচাকৈয়ে সন্মানৰ যোগ্য বুলি বিবেচিত হওঁ? মই এই পত্ৰখন কেৱল এগৰাকী খেলুৱৈ হিচাপেই নহয়, বছৰ বছৰ ধৰি বক্সিং ৰিঙত দেশৰ আশা কঢ়িয়াই লৈ ফুৰা এগৰাকী মহিলা হিচাপে লিখিছো। ৮ জুলাইত বিএফআই আৰু ট’পছৰ মাজত হোৱা বৈঠকৰ সময়ত কৰ্ণেল মালিকে মোৰ পিনে চিঞৰি কৈছিল, ‘চুপ থাকা, মূৰ তল কৰি থাকা।’ মোক তেওঁৰ আদেশ মানি চলিবলৈ বাধ্য কৰা হৈছিল। তেওঁৰ আচৰণ কেৱল অসন্মানজনকেই নাছিল, বৈষম্যমূলক আৰু নাৰীসকলৰ বিৰুদ্ধে ক্ষমতাৰ প্ৰদৰ্শনও আছিল।”
লাভলিনাৰ এই অভিযোগৰ উত্তৰত কৰ্ণেল অৰুণ মালিকে সংবাদ মাধ্যমৰ আগত কয়, “মোক বদনাম কৰা হৈছে।” ইয়াৰ লগতে অৰুণে কয় যে লাভলিনাই বৈঠকত দুটা দাবী উত্থাপন কৰিছিল। প্ৰথমটো আছিল হাংগেৰীত অনুষ্ঠিত হ’বলগীয়া বিশ্ব চেম্পিয়নশ্বিপৰ বাবে প্ৰশিক্ষণ লোৱাৰ সুযোগ দিয়া। লভলিনাই হাংগেৰীলৈ গৈ বিশ্ব বক্সিং চেম্পিয়নশ্বিপৰ বাবে প্ৰশিক্ষণ ল’ব বিচাৰিছিল। বিশ্ব চেম্পিয়নশ্বিপৰ দলটো তেতিয়াও ঘোষণা কৰা হোৱা নাই। এই সন্দৰ্ভত মই ক’লো যে দল ঘোষণা হোৱাৰ পিছত পৰৱৰ্তী প্ৰক্ৰিয়া আৰম্ভ কৰিব পাৰি। ইয়াৰ সমস্যাটো হ’ল আয়োজক সমিতিৰ (ব্ৰিটেইন বক্সিং এছ’চিয়েচন) ভিছাৰ বাবে ২০টা কৰ্মদিনৰ প্ৰয়োজন হয়। তাত ভিছাৰ বাবে পাছপ’ৰ্ট জমা দিব লাগিব। যদি আপুনি হাংগেৰীৰ বাবে এই কাম কৰে, তেন্তে ব্ৰিটিছ ভিছাৰ বাবে সমস্যা হ’ব পাৰে।”
লাভলিনাৰ দ্বিতীয়টো দাবী আছিল যে এজন ব্যক্তিগত প্ৰশিক্ষক আৰু ফিজিঅ’ক তেওঁক হাংগেৰীলৈ লৈ যাবলৈ দিয়া হওক। অৰুণ মালিকে কয়, “জুম কলত তেওঁৰ ব্যক্তিগত প্ৰশিক্ষকো সংযোগত আছিল। আমি লভলিনাক কৈছিলো যে চৰকাৰ আৰু বিএফআইৰ নিয়ম অনুসৰি বক্সিংত ব্যক্তিগত প্ৰশিক্ষকক অনুমতি দিয়া নহয়। এজন প্ৰশিক্ষকে কমেও পাঁচজন বক্সাৰক প্ৰশিক্ষণ দিব লাগে। এই সন্দৰ্ভত লাভলিনাই কয় যে পিভি সিন্ধুৱে ব্যক্তিগত প্ৰশিক্ষক লগত লৈ যায়। ইয়াৰ পিছত ছাইৰ বিষয়াগৰাকীয়ে কয় যে এই তথ্য ভুল। তেওঁ কেম্পৰ প্ৰশিক্ষকৰ পৰাও প্ৰশিক্ষণ লয়।”
অৰুণে কয়, “লাভলিনাই বৈঠকৰ এদিন পিছত অভিযোগ কৰিছে। দুদিন পিছত এখন কমিটী গঠন কৰা হয়, যাৰ অধ্যক্ষ টপছৰ চিইঅ’ও। মই ছাইলৈ দুখন পত্ৰ লিখি ৰিপ’ৰ্ট প্ৰকাশ কৰিবলৈ অনুৰোধ জনাইছো। কিন্তু ৰিপৰ্ট এতিয়াও অহা নাই।”
