দেশৰ ক্ৰীড়া জগতত ঈৰ্ষণীয় সফলতাৰ পৰিণামস্বৰূপে ইটোৰ পিছত সিটো ভাল খবৰে পিছ নেৰা হ’ল দেশৰ নৱতম ক্ৰীড়া চাঞ্চল্য হিমা দাসৰ। এইবাৰ হিমালৈ ইণ্ডিয়ান অইল কৰ্প’ৰেইশ্যন লিমিটেডে আগ বঢ়াইছে বিষয়াৰ চাকৰি। আই অ’ চি এলৰ মুখ্য মহাপ্ৰবন্ধক উট্টিয়া ভট্টাচাৰ্যই নৰ্থ-ইষ্ট নাওক এই কথা কয়।
জানিব পৰামতে, হিমাৰ পদটোৰ নাম মানৱ সম্পদ বিষয়া (HR Officer)। খেলুৱৈগৰাকীৰ সুবিধা হোৱাকৈ তেওঁক অসম শাখাৰ গুৱাহাটীস্থিত ৰাজ্যিক কাৰ্যালয়তে নিযুক্তি দিয়া হৈছে। অৱশ্যে যিমান দিনলৈ খেলি থাকিব, সিমান দিনলৈ চাকৰিৰ বাবে কাৰ্যালয়ত উপস্থিত থাকিব নালাগে হিমাই।
চাকৰিৰ উপৰি আই অ’ চি এলে যোগান ধৰিব হিমাৰ সকলো ৰাষ্ট্ৰীয় আৰু আন্তঃৰাষ্ট্ৰীয় ক্ৰীড়া প্ৰতিযোগিতাৰ খৰচ।
উল্লেখযোগ্য যে বিশ্ব ক্ৰীড়াংগণত বিৰল সফলতাৰ পিছতে হিমালৈ অসম চৰকাৰৰ চাকৰিকে ধৰি কেইবাটাও প্ৰতিষ্ঠানৰ পৰা ডাঙৰ ডাঙৰ চাকৰিৰ প্ৰস্তাৱ আহিছে। আনহাতে অলপতে হিমাই বিশ্বৰ দ্বিতীয় বৃহৎ ক্ৰীড়া সামগ্ৰী প্ৰস্তুতকৰ্তা কোম্পানী এডিডাছৰ সৈতেও এটা বাণিজ্যিক চুক্তিত আবদ্ধ হৈছিল।
