মেঘালয়ৰ ৰি ভ’ই জিলাৰ উমৰোই সেনা চাউনীত সোমবাৰৰ পৰা আৰম্ভ হৈছে ভাৰতীয়া সেনাবাহিনী আৰু ৰোয়েল থাইলেণ্ড সেনাবাহিনীৰ যুটীয়া সামৰিক অনুশীলন।
ৰাষ্ট্ৰসংঘৰ নীতি অনুসৰি ২০০৬ চনৰ পৰা অনুষ্ঠিত হৈ অহা ইণ্ডো-থাইলেণ্ড যুটীয়া সামৰিক অভ্যাস চলিত বৰ্ষতো ‘মৈত্ৰী-২০১৯’ নামেৰে ১৬ ছেপ্টেম্বৰৰ পৰা ২৯ ছেপ্টেম্বৰলৈ ১৪ দিনীয় বিভিন্ন অনুশীলনৰ মাজেৰে অনুষ্ঠিত হৈছে।
অৰণ্য আৰু চহৰ অঞ্চলত সন্ত্ৰাসবাদীৰ সৈতে যুদ্ধ কৰাৰ বিভিন্ন কৌশলক লৈ প্ৰতিবছৰে ‘মৈত্ৰী’ নামেৰে ভাৰত আৰু থাইলেণ্ডৰ সেনা বাহিনীৰ মাজত এই সামৰিক অভ্যাস অনুষ্ঠিত হৈ আহিছে।
ৰোয়েল থাইলেণ্ড আৰ্মিৰ ১১১ ৰেজিমেণ্টৰ এটা ৪৫ জনীয়া সেনাবাহিনীৰ দলে ভাৰতীয় সেনা বাহিনীৰ সৈতে যুটীয়া সামৰিক অনুশীলনত অংশগ্ৰহণ কৰিছে।
২০০৬ চনৰ পৰা প্ৰতিবছৰে অনুষ্ঠিত হৈ অহা ভাৰত আৰু থাইলেণ্ডৰ সেনাৰ মাজৰ এই যুটীয়া সামৰিক অনুশীলনে দুয়োখন দেশৰ দ্বিপাক্ষিক সম্পৰ্কক দৃঢ়তা প্ৰদান কৰি আহিছে।
যুটীয়া সামৰিক অনুশীলনৰ অংশস্বৰূপে দুয়োখন দেশে নিজৰ নিজৰ দেশৰ সেনাবাহিনীয়ে ব্যৱহাৰ কৰি অহা অস্ত্ৰ-শস্ত্ৰ প্ৰদৰ্শন কৰিব।
সামৰিক অনুশীলনৰ সময়ত দুয়োখন দেশৰ সেনাবাহিনীয়ে সন্ত্ৰাসবাদৰ বিৰুদ্ধে একগোট হৈ যুঁজাৰ বিভিন্ন কৌশলকে ধৰি, ড্ৰীলছ, অস্ত্ৰ চালনা আদিৰ বিভিন্ন কৌশলৰ ওপৰত অনুশীলন কৰিব।
