ওৰাং ৰাষ্ট্ৰীয় উদ্যানৰ পৰা জন অৰণ্যৰ মাজলৈ ওলাই আহি প্ৰায় দুমাহ বনাই বনাই ঘুৰি থকা ঢেকীয়া পতীয়া বাঘিনীটো বন বিভাগে শাৰীৰিক ভাবে অসুস্থ আৰু অতি দুৰ্বল অবস্থাত ৫ এপ্ৰিলত উদ্ধাৰ কৰিছিল। বৰ্তমান অসুস্থ বাঘিনীটোক অসম ৰাজ্যিক চিৰিয়াখানাত পশু চকিৎসক সকলৰ তত্বাবধানত চিকিৎসা প্ৰদান কৰি থকা হৈছে।
আঘাপ্ৰাপ্ত বাঘিনীটোক শোণিতপুৰ জিলাৰ ওৰাং ৰাষ্ট্ৰীয় উদ্যানৰ ওচৰৰ পৰা উদ্ধাৰ কৰি অসম ৰাজ্যিক চিৰিয়াখানালৈ লৈ অহা হয়।
চিৰিয়াখানা বিভাগৰ বন বিষয়া তেজস মৰিস্বামীয়ে নৰ্থ-ইষ্ট নাওৰ আগত জনোৱা অনুসৰি উদ্ধাৰ কৰাৰ সময়ত বাঘিনীটোৱে চকুৰে নেদেখা অবস্থাত থকাৰ লগতে তাইৰ নখবোৰ দুৰ্বল হৈ পৰিছিল।
নখ আৰু চকুৰ দৃষ্টি শক্তি হেৰুওৱাৰ বাবে বাঘিনীটো প্ৰায় মৃত্যুৰ দুৱাৰ দলিত উপস্থিত হৈছিল কিন্তু বৰ্তমান পশু চিকিৎসকসকলৰ একানপতীয়া প্ৰচেষ্টা আৰু চিকিৎসাৰ ফলত তাইৰ স্বাস্থ্যৰ যথেষ্ট উন্নতি হৈছে।
চকুৰ দৃষ্টি শক্তিৰ লোপ পোৱা প্ৰসংগত বিষয়াগৰাকীয়ে বাঘিনীটোৰ চকুৰ কৰ্ণিয়াত বিষাক্ত খাদ্য ভক্ষণৰ বাবে সংক্ৰমণ হোৱাৰ ফলত দৃষ্টি শক্তি অস্বাভাবিকভাবে কমি আহিছিল বুলি মন্তব্য কৰে। সম্পুৰ্ণৰূপে নহ’লেও আংশিকভাবে চকুৰ দৃষ্টি শক্তি ঘূৰাই আনিব পৰা যাব বুলি তেওঁ মন্তব্য কৰে।
উল্লেখযোগ্য যে, উদ্ধাৰ হোৱা বাঘিনীটোৱে ওৰাং ৰাষ্ট্ৰীয় উদ্যানৰ পৰা অন্য বাঘৰ লগত হোৱা যুদ্ধৰ ফলত উদ্যানখনৰ বাহিৰলৈ ওলাই আহিছিল বুলি সন্দেহ কৰা হয়। চকুৰ ৰোগ আৰোগ্য হ’লে বাঘিনীটোক পুনৰ ওৰাং ৰাষ্ট্ৰীয় উদ্যানত মুকলি কৰি দিয়া হ’ব।
