মঙলবাৰৰ অসম বন্ধৰ সময়তে সন্ধিয়া বৰপেটা জিলাৰ বৰনগৰ প্ৰেছ ক্লাবৰ প্ৰতিষ্ঠা দিৱস উপলক্ষে উপস্থিত হোৱা বিজেপিৰ ৰাজ্যিক সভাপতি ৰঞ্জিৎ দাসে সাংবাদিকৰ আগত তাৎপৰ্যপূৰ্ণ মন্তব্য কৰি কয় যে বন্ধৰ সময়ত বীমা কোম্পানি সমূহে ক্লেইম সমূহ মানি নলয় কাৰণেই কালিৰ অসম বন্ধত গাড়ীৰ চলাচল বন্ধ আছিল।
ৰাজ্যৰ প্ৰায় ৬০টা জাতীয় সংগঠনে আহ্বান জনোৱা অসম বন্ধক ভিত্তীহিন আখ্যা দি সভাপতিগৰাকীয়ে ধুবুৰী তথা চৰ-চাপৰিলৈ গৈ বাংলাদেশী আছে নে নাই চাব লাগে বুলি বন্ধ সমৰ্থকসকলক কটাক্ষ কৰে।
আনহাতে কংগ্ৰেছ আৰু এ আই য়ু ডি এফ দল দুটা একেটা মুদ্ৰাৰে ইপিঠি সিপিঠি বুলি মন্তব্য কৰি কংগ্ৰেছে বদৰুদ্দিন আজমলক মুখ্য মন্ত্ৰী পতাটো স্বাভাৱিক বুলি কয়। তেওঁ লগতে বদৰুদ্দিন আজমলৰ দৰে ব্যক্তি অসমৰ মুখ্য মন্ত্ৰী হ’লে জীয়াই থকাতকৈ নথকাই ভাল বুলি পুনৰ এবাৰ মন্তব্য কৰা দেখা যায়।
উল্লেখ্য যে বৰপেটা জিলাৰ সৰভোগৰ বৰনগৰ প্ৰেছ ক্লাবৰ ২৮ সংখ্যক প্ৰতিষ্ঠা দিৱস উপলক্ষে ৰাতিপুৱা শুভাৰম্ভ অনুষ্ঠানত মুখ্য অতিথি হিচাপে অংশগ্ৰহণ কৰি স্থানীয় বিধায়ক তথা বিজেপিৰ ৰাজ্যিক সভাপতি ৰঞ্জিৎ কুমাৰ দাসে গণতন্ত্ৰৰ চতুৰ্থ স্তম্ভৰ দায়িত্ব ও কৰ্তব্যৰ বিষয়ে আলোচনা কৰে।
এই অনুষ্ঠানতে “বৰেণ্য বৰনগৰীয়া” নামৰ এখন জীৱনী গ্ৰন্থও উন্মোচন কৰা হয়। কালিৰ প্ৰতিষ্ঠা দিৱসৰ অনুষ্ঠানত বাৰ্ডচ একাডেমিৰ অধ্যক্ষ ৰমেশ চন্দ্ৰ ভট্টাচাৰ্য, ড° বীৰেণ কুমাৰ চক্ৰৱৰ্তী, বৰনগৰ প্ৰেছ ক্লাবৰ প্ৰতিষ্ঠাপক উপ সভাপতি কৰুণাকান্ত ৰায়, প্ৰাক্তন সভাপতি শংকৰ চন্দ্ৰ দাস, আক্ৰাছুৰ প্ৰাক্তন সভাপতি বিশ্বজিত ৰায়ৰ লগতে উপস্থিত থাকে বৰনগৰ ৰাজহ চক্ৰৰ চক্ৰ বিষয়া মানাহ কুমাৰ শইকীয়া, প্ৰেছ ক্লাবটোৰ বৰ্তমানৰ সভাপতি তৰুণ চন্দ্ৰ গোস্বামীৰ লগতে সাধাৰণ সম্পাদক পুলেন কুমাৰ দাস।
