চলিত বৰ্ষৰ আইপিএলৰ প্ৰাকমুহূৰ্তত দিল্লী কেপিটেলছে এক গভীৰ সংকটৰ সম্মুখীন হৈছে।
দলটোৰ নিয়মীয়া অধিনায়ক শ্ৰেয়ষ আয়াৰৰ আঘাতজনিত সমস্যাৰ বাবে অধিনায়কৰ দায়িত্ব দিয়া হৈছে ঋষভ পণ্টক।
শনিবাৰে দলটোৰ অন্যতম ভৰসা তথা ভাৰতৰ তাৰকা অলৰাউণ্ডাৰ অক্ষৰ পেটেলৰ ক’ভিড-১৯ পজিটিভ ধৰা পৰিছে।
দলটোৱে এক বিবৃত্তিৰ জৰিয়তে এই কথা প্ৰকাশ কৰিছে।
বিবৃত্তিটোৰ মতে, মুম্বাইৰ দলটোৱে বাহৰ পতা হোটলত তেওঁক পৰীক্ষা কৰা হয় আৰু নিগেটিভ পোৱা যায়।
কিন্তু দ্বিতীয়বাৰ পৰীক্ষা কৰি চোৱাত পজিটিভ পোৱা যায়।
অক্ষৰে কমেও ১০ দিনৰ বাবে আইচলেচনত থাকিব লাগিব।
অক্ষৰৰ ক’ভিড-১৯ পজিটিভ ধৰা পৰাৰ পাছত দলটোৰ সকলো খেলুৱৈ ৭ দিনৰ বাবে তেওঁলোকৰ হোটেলৰ কোঠালিসমূহ কোৱাৰেণ্টাইনত থাকিব লাগিব।
উল্লেখযোগ্য যে ইয়াৰ পূৰ্বে চলিত বৰ্ষৰ আইপিএলত অংশ ল’ব লগা কলকাতা নাইট ৰাইডাৰ্ছৰ তাৰকা নীতিশ ৰাণাৰো ক’ভিড-১৯ পজিটিভ পোৱা গৈছিল।
দিল্লী কেপিটেলছে ১০ এপ্ৰিলৰ পৰা চলিত বৰ্ষৰ আইপিএলত নিজৰ যাত্ৰা আৰম্ভ কৰিব।
দলটোৱে মুম্বাইৰ ৱাংখেড়ে ষ্টেডিয়ামত মহেন্দ্ৰ সিং ধোনী নেতৃত্বাধীন চেন্নাই চুপাৰ কিংছৰ বিৰু্দ্ধে প্ৰথমখন মেচত অংশগ্ৰহণ কৰিব।
