আশংকাই সঁচা হ’ল, ভাৰত-পাক যুদ্ধৰ বাবে পিছুৱাই দিয়া হৈছে আই পি এল। প্ৰতিযোগিতাখনৰ বাকী অংশ কেতিয়া, কেনেকৈ বা আয়োজন কৰা হ’ব নে নাই সেই বিষয়ে ব’ৰ্ডে আন অংশীদাৰসকলৰ সৈতে আলোচনা কৰি আছে। সকলো পক্ষৰ সৈতে আলোচনাৰ অন্ততহে এই সিদ্ধান্ত আনুষ্ঠানিকভাৱে ঘোষণা কৰা হ’ব।
দৰাচলতে যুদ্ধৰ পৰিস্থিতিয়ে ক্ৰিকেটাৰ আৰু অনুৰাগীৰ সুৰক্ষাৰ কথা বিবেচনা কৰি মেগা টুৰ্ণামেণ্ট অনুষ্ঠিত কৰাটো বিপদজনক কৰি তুলিছিল।
বৃহস্পতিবাৰে ধৰ্মশালাত দিল্লী কেপিটেলছ আৰু পঞ্জাব কিংছ মুখামুখি হয়। কিন্তু পাকিস্তানৰ অবিৰত আক্ৰমণৰ বাবে ধৰ্মশালা ব্লেক আউট কৰা হয়। ষ্টেডিয়ামৰ লাইটবোৰ এটা এটাকৈ নুমাই যায়। ইয়াৰ পিছতে খেলখন বাতিল কৰাৰ কথা ঘোষণা কৰা হয়। দৰ্শক আৰু আই পি এলৰ বিষয়াসকলক অনতিপলমে ষ্টেডিয়ামৰ পৰা ওলাই যাবলৈ কোৱা হয়।
ইয়াৰ পিছতে গভৰ্নিং কাউন্সিলে জৰুৰী বৈঠক অনুষ্ঠিত কৰি প্ৰতিযোগিতাখনৰ ভৱিষ্যত নিৰ্ণয় কৰে। সেই বৈঠকতে সিদ্ধান্ত লোৱা হয় যে মেগা টুৰ্ণামেণ্টখন আপাততঃ পিছুৱাই দিয়া হ’ব।
সূত্ৰৰ মতে, যুদ্ধকালীন সাম্প্ৰতিক পৰিস্থিতিক লৈ চিন্তিত হৈ পৰিছে বিদেশী তাৰকাসকল। পাঞ্জাব কিংছৰ দুই ক্ৰিকেটাৰ মাৰ্কাছ ষ্ট’ইনিছ আৰু জোছ ইংলিছে উদ্বেগ প্ৰকাশ কৰাৰ লগতে ঘৰলৈ উভতি যোৱাৰ ইচ্ছাও প্ৰকাশ কৰিছে।
ভাৰতীয় ব’ৰ্ডে যুদ্ধ পৰিস্থিতিৰ মাজত দেশখনত ক্ৰিকেটাৰসকলক লৈ বিশেষ সতৰ্কতা অৱলম্বন কৰিছে। খবৰ অনুসৰি ক্ৰিকেটাৰসকলক কেনেকৈ ঘৰলৈ ঘূৰাই পঠাব পাৰি তাৰ ব্লুপ্ৰিণ্টো প্ৰস্তুত কৰা হৈছে।
আই পি এলৰ বাকী অংশ কেতিয়া, কেনেদৰে বা আয়োজন কৰা হ’ব নে নাই সেই বিষয়ে সকলো অংশীদাৰৰ সৈতে আলোচনাৰ অন্তত স্পষ্ট কৰা হ’ব। সম্প্ৰতি সকলো পক্ষৰ সৈতে আলোচনাত মিলিত হৈছে ব’ৰ্ড।
