২০২৬ চনৰ ইণ্ডিয়ান প্ৰিমিয়াৰ লীগৰ পূৰ্বে ৰাহুল দ্ৰাবিড়ৰ সৈতে চুক্তিৰ অৱসান হোৱাটো নিশ্চিত কৰিছে ৰাজস্থান ৰয়েলছে। পূৰ্বে অধিনায়ক আৰু প্ৰশিক্ষক হিচাপে থকা ৰাহুল দ্ৰাবিড়ে ২০২৪ চনৰ ৬ ছেপ্টেম্বৰত নিযুক্তি লাভ কৰিছিল। ৰয়েলছৰ হৈ ৪৬খন মেচ খেলা ভাৰতীয় প্ৰাক্তন অধিনায়কগৰাকীয়ে জাতীয় ক্ৰিকেট দলৰ সৈতে কাৰ্যকাল সমাপ্ত হোৱাৰ পাছত দায়িত্ব লয়।
২০২৫ চনৰ আই পি এলত দ্ৰাবিড়ৰ অধীনত ৰাজস্থানে ১৪খন মেচৰ পৰা মাত্ৰ চাৰিখন মেচত জয় লাভ কৰি পইণ্ট তালিকাৰ নৱম স্থান দখল কৰিছিল।
শেহতীয়াকৈ কৰা গাঁথনিগত পৰ্যালোচনাৰ অংশ হিচাপে দ্ৰাবিড়ক ফ্ৰেঞ্চাইজিৰ ভিতৰত অধিক দায়িত্ব প্ৰদান কৰা হৈছিল যদিও তেওঁ সেই ভূমিকা গ্ৰহণ কৰা নাছিল। ২০১১ চনত প্ৰথমবাৰৰ বাবে খেলুৱৈ হিচাপে ৰয়েলছত যোগদান কৰা তেওঁ ২০১২ আৰু ২০১৩ চনত দলৰ অধিনায়ক হিচাপে কাৰ্যনিৰ্বাহ কৰিছিল, পিছলৈ ২০১৪ আৰু ২০১৫ চনত দলৰ পৰিচালক আৰু প্ৰশিক্ষক হিচাপে কাৰ্যনিৰ্বাহ কৰিছিল।২০২৪ চনত মুখ্য প্ৰশিক্ষক হিচাপে ঘূৰি অহাৰ পাছত দ্ৰাবিড়ে দলৰ প্ৰদৰ্শন আৰু সংস্কৃতি শক্তিশালী কৰাৰ বাবে প্ৰশংসা লাভ কৰিছিল।
