ইৰাণ আৰু ইজৰাইলৰ সংঘাতৰ বাবে গোটেই নিশা পশ্চিম এছিয়া উত্তাল হৈ থাকিল। ইৰাণে জেৰুজালেম আৰু টেল আভিভত ক্ষেপণাস্ত্ৰ নিক্ষেপ কৰে। ইজৰাইলেও ইয়াৰ প্ৰতিক্ৰিয়া প্ৰকাশ কৰিছে। শনিবাৰ আৰু দেওবাৰৰ মাজনিশা দুয়োখন দেশৰ এক বিস্তৃত অঞ্চলত ক্ষেপণাস্ত্ৰ বৰ্ষণ হৈছে। ব্যাপক ক্ষতিও হৈছে।
ইৰাণৰ গোলাবৰ্ষণৰ ফলত ইজৰাইলৰ দুখন ডাঙৰ চহৰত বহু ঘৰ-বাৰী ভাঙি গৈছে। প্ৰশাসনে কেইবাজনো লোকৰ মৃত্যুও নিশ্চিত কৰিছে। একে সময়তে ইৰাণৰ তৈল ভাণ্ডাৰত ক্ষেপণাস্ত্ৰ নিক্ষেপ কৰিছে ইজৰাইলে। সেই দেশৰ চৰকাৰে এতিয়ালৈকে কোনো বৃহৎ ক্ষতিৰ কথা স্বীকাৰ কৰা নাই। অৱশ্যে ইৰাণতো নিশাৰ আক্ৰমণত বহু লোকৰ মৃত্যু হৈছে।
ইজৰাইলৰ সেনাই জনোৱা মতে, শনিবাৰে নিশাৰ পৰা দেওবাৰে পুৱাৰ ভিতৰত ইৰাণৰ পৰা ক্ষেপণাস্ত্ৰ নিক্ষেপ কৰা হৈছে। ইয়াৰে কোনোটোৰ টেল আভিভ, আন কোনোটোত ৰাজধানী জেৰুজালেমক লক্ষ্য কৰি লোৱা হৈছিল। দেওবাৰৰ পুৱাৰে পৰা দুয়োখন চহৰতে অবিৰতভাৱে বাজি আছে চাইৰেন।
সংবাদ সংস্থাই প্ৰকাশ কৰা বাতৰি অনুসৰি, ৰাতিটোৰ ভিতৰত টেল আভিভৰ ওপৰেৰে আকাশত বহু ক্ষেপণাস্ত্ৰ দেখা গৈছিল, পুৱতি নিশালৈকে ইয়াৰ সংখ্যা বৃদ্ধি পাইছিল। একে সময়তে ইজৰাইলৰ পৰাও ইন্টাৰচেপ্টৰ ৰকেট নিক্ষেপ কৰা হৈছিল। কিন্তু টেল আভিভ আৰু জেৰুজালেমত বিস্ফোৰণৰ শব্দই কাণ তাল মাৰি ধৰিছিল। প্ৰতিৰোধৰ মাজতো ইৰাণৰ কেইবাটাও ক্ষেপণাস্ত্ৰ ইজৰাইলৰ মাটিত পৰে। ক্ষেপণাস্ত্ৰৰ ফলত কেইবাটাও ঘৰ ধ্বংস হয়।
উত্তৰ ইজৰাইলত সংঘটিত আক্ৰমণত তিনিগৰাকী মহিলাৰ মৃত্যু হোৱাটো নিশ্চিত কৰিছে এম্বুলেন্স কৰ্তৃপক্ষই। আহত হৈছে কমেও ১০জন লোক। ভাঙি পৰা ঘৰৰ ধ্বংসাৱশেষ আঁতৰাই উদ্ধাৰ কাম অব্যাহত আছে। পুৱা প্ৰায় ২:৩০ বজাত (স্থানীয় সময় অনুসৰি) ইজৰাইলী সেনাই জনসাধাৰণক সকীয়াই দি ক্ষিপ্ৰতাৰে আশ্ৰয় ল’বলৈ নিৰ্দেশ দিয়ে।
পুৱা ৩:৩০ বজালৈকে ইৰাণৰ আক্ৰমণত চাৰিজন লোকৰ মৃত্যু হোৱা বুলি ৰয়টাৰে প্ৰকাশ কৰিছে। আহত লোকৰ সংখ্যা কমেও ৩৬ জন। নিশাৰ ভিতৰতে এই আক্ৰমণত মৃত্যুৰ সংখ্যা বৃদ্ধি পাব পাৰে। মধ্য ইজৰাইলত নিশা ভাঙি পৰে এটা ১০ মহলীয়া অট্টালিকা।
ইজৰাইলৰ গোলাবৰ্ষণেও নিশা ইৰাণত আঘাত হানে। ৰাজধানী তেহৰাণৰ শ্বাহৰাণৰ তেল ডিপোত ইজৰাইলে ক্ষেপণাস্ত্ৰ নিক্ষেপ কৰে। ছবিত তেল ডিপোটো জ্বলি থকা দেখা গৈছে। নিশাৰ আকাশ ক’লা ধোঁৱাই আৱৰি ধৰিছে। যদিও ইৰাণে কয় যে ইজৰাইলী ক্ষেপণাস্ত্ৰই শ্বাহৰাণত আঘাত কৰাৰ পিছতো পৰিস্থিতি নিয়ন্ত্ৰণত আছে। তদুপৰি তেহৰাণৰ ইৰাণৰ প্ৰতিৰক্ষা মন্ত্ৰালয়ৰ ভৱনত এটা ক্ষেপণাস্ত্ৰই আঘাত কৰে। ইয়াৰ ফলত সামান্য ক্ষতিও হয়। ইৰাণৰ তাছনিম সংবাদ সংস্থাই দেওবাৰে এই তথ্য প্ৰকাশ কৰিছে।
ইৰাণৰ ৰিভল্যুচনেৰী গাৰ্ডে জনোৱা মতে, নিশাৰ ভাগত ইজৰাইলৰ যুঁজাৰু বিমানৰ ইন্ধন উৎপাদন কেন্দ্ৰ আৰু বিভিন্ন শক্তিৰ আন্তঃগাঁথনিক মিছাইল আৰু ড্ৰ’নে লক্ষ্য কৰি লৈছিল। ইৰাণৰ সেনাই আগন্তুক দিনত আৰু অধিক শক্তিশালী আক্ৰমণৰ সতৰ্কবাণীও দিয়ে।
পাৰমাণৱিক চুক্তি সন্দৰ্ভত আমেৰিকাৰ সৈতে আলোচনা নকৰাৰ বাবে ইৰাণক আক্ৰমণ কৰে ইজৰাইলে। এই আক্ৰমণত ইৰাণৰ চাৰিজন শীৰ্ষ সামৰিক বিষয়া আৰু ৯ গৰাকী পাৰমাণৱিক বিজ্ঞানী নিহত হয়। ইয়াৰ কিছু সময়ৰ পিছতে তেহৰানে প্ৰত্যাক্ৰমণ আৰম্ভ কৰে।
আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে ইৰাণৰ ওপৰত ইজৰাইলৰ আক্ৰমণৰ বিষয়ে তেওঁ আগতীয়াকৈ জানিছিল আৰু এই আক্ৰমণক সমৰ্থন কৰে। দেওবাৰে অনুষ্ঠিত হ’বলগীয়া পাৰমাণৱিক চুক্তি সন্দৰ্ভত আমেৰিকাৰ প্ৰতিনিধি আৰু ইৰাণৰ মাজত হোৱা বৈঠক ইজৰাইলৰ আক্ৰমণৰ পিছত ইৰাণে বাতিল কৰে। তেতিয়াৰ পৰা দুয়োখন দেশৰ মাজত সংঘাত বৃদ্ধি পাইছে।
