ইৰফান খানৰ মাতৃৰ মৃত্যু; লকডাউনৰ বাবে ঘৰৰ পৰা দূৰত আৱদ্ধ হৈ ৰ’ল অভিনেতাগৰাকী

বলীউদৰ খ্যাতনামা অভিনেতা ইৰফান খানৰ মাতৃ ৮৫ বৰ্ষীয়া ছইদা বেগমৰ পৰলোকপ্ৰাপ্তি ঘটিছে। তেওঁ শনিবাৰে সন্ধিয়া জয়পুৰৰ নিজা বাসভৱনত ইহলীলা সম্বৰণ কৰে। দীৰ্ঘদিন ধৰি তেওঁ অসুস্থ হৈ আছিল।

আনহাতে, অভিনেতা ইৰফান খানে তেওঁৰ মাতৃৰ অন্তিম সৎকাৰৰ সময়ত উপস্থিত থাকিব নোৱাৰিলে। কিয়নো তেওঁ এতিয়া জয়পুৰত নাই।

জানিব পৰা মতে, ইৰফান খান তেওঁৰ পত্নীৰ সৈতে মুম্বাইত আছে আৰু লকডাউন চলি থকাৰ বাবে ভ্ৰমণ কৰিব নোৱাৰে।

বাতৰি অনুসৰি, শনিবাৰে সন্ধিয়াই অভিনেতাগৰাকীৰ মাতৃৰ অন্তিম সৎকাৰ কৰাৰ কথা। সেয়েহে, ইৰফান তাত উপস্থিত থাকিব নোৱাৰিলে।

ইৰফানৰ মাতৃৰ বিয়োগৰ পাছতে অভিনেতাগৰাকীৰ ঘনিষ্ঠ বন্ধু পৰিচালক সুজিত সৰকাৰে প্ৰতিক্ৰিয়া প্ৰকাশ কৰিছে। ইৰফানৰ মাতৃৰ বিয়োগত তেওঁ শোক প্ৰকাশ কৰি অভিনেতাগৰাকীৰ সৈতে কথা পাতে।

পৰিচালক সুজিত সৰকাৰে পৰিচালনা কৰা পীকু ছবিখনত ইৰফানে অভিনয় কৰিছে।

ইৰফান খানক শেহতীয়াকৈ ‘অংগ্ৰেজী মিডিয়াম’ ছবিখনত দেখা গৈছিল। কৰ’না ভাইৰাছৰ আতংক চলি থকাৰ বাবে ছবিখন ৰূপালী পৰ্দাত বেছি দিন চলিব নাপালে। পাছত ছবিখন ডিজিটেল প্লেটফৰ্মত মুক্তি দিয়া দিয়া হয়।