ইজৰাইলে বৃহস্পতিবাৰে ইৰাণৰ পাৰমাণৱিক কেন্দ্ৰ, বেলিষ্টিক মিছাইল কাৰখানা আৰু সামৰিক কেন্দ্ৰত আক্ৰমণ চলাইছিল। ইয়াৰ ২৪ ঘণ্টাৰ ভিতৰতে পুনৰ আক্ৰমণ চলাইছে। আইডিএফে পুনৰ ইৰাণৰ বিভিন্ন স্থানক ‘টাৰ্গেট’ কৰিছে।
কেইবাটাও আন্তঃৰাষ্ট্ৰীয় সংবাদ মাধ্যমৰ খবৰ অনুসৰি শুকুৰবাৰে নিশা বেঞ্জামিন নেতানিয়াহুৰ চৰকাৰে ইৰাণৰ ৰাজধানী তেহৰাণত নতুনকৈ আক্ৰমণ চলায়।
সূত্ৰসমূহে জনোৱা মতে, পশ্চিম তেহৰাণত নতুনকৈ আক্ৰমণ চলোৱা হৈছে। অৱশ্যে ইৰাণেও দাবী কৰিছে যে তেওঁলোকৰ বায়ু প্ৰতিৰক্ষা ব্যৱস্থাই ইজৰাইলৰ কেইবাটাও ক্ষেপণাস্ত্ৰ ধ্বংস কৰিছে।
ইজৰাইলতো যে প্ৰত্যাক্ৰমণ হ’ব সেই কথা অনুমান কৰিছে দেশখনৰ প্ৰধানমন্ত্ৰীয়ে। সেইবাবেই তেওঁলোকৰ বায়ু প্ৰতিৰক্ষা ব্যৱস্থা সক্ৰিয় কৰা হৈছে। খবৰ পোৱা গৈছে যে জেৰুজালেমত ইতিমধ্যে চাইৰেন বাজিবলৈ আৰম্ভ কৰিছে।
আইডিএফে ইংগিত লাভ কৰিছে যে য়েমেনৰ পৰা তেওঁলোকৰ বিৰুদ্ধে মিছাইল নিক্ষেপ কৰিব পাৰে। সেয়ে সষ্টম হৈ পৰিছে সেনা। আনহাতে ইৰাণৰ শীর্ষ নেতৃত্বই ভাবুকি দিছে – ইজৰাইলক শান্তিৰে শুবলৈ দিয়া নহ’ব৷
ইজৰাইলে শুকুৰবাৰে পুৱা ইৰাণক ‘অপাৰেচন ৰাইজিং লায়ন’ চলাই তচনচ কৰি পেলাইছে। বিভিন্ন সূত্ৰৰ মতে ইৰাণৰ পাৰমাণৱিক কেন্দ্ৰ ধ্বংস কৰি দিয়া হৈছে। অৱশ্যে শেহতীয়া খবৰত জানিব পৰা গৈছে যে তেজষ্ক্ৰিয় বিকীৰণৰ কোনো ঘটনা ঘটা নাই।
ইজৰাইলৰ দাবী যে ইৰাণে পাৰমাণৱিক অস্ত্ৰ নিৰ্মাণ কৰি সন্ত্ৰাসবাদীক গতাই দিবলৈ চেষ্টা কৰিছিল। দেখা গৈছে যে ইৰাণৰ প্ৰতিশোধৰ পূৰ্বে সেই দেশৰ ওপৰত আন এক আক্ৰমণ সংঘটিত হৈছে।
ইপিনে, ইজৰাইলৰ আক্ৰমণ সন্দৰ্ভত আমেৰিকাই কোনো মন্তব্য কৰা নাই। ইয়াৰ পৰা দূৰত অৱস্থান কৰিছে। দুয়োপক্ষকে সংযম ৰক্ষা কৰিবলৈ আহ্বান জনাইছে ব্ৰিটেইনে। শুকুৰবাৰে নিশা বেঞ্জামিন নেতানিয়াহুৱে ভাৰতৰ প্ৰধানমন্ত্ৰী নৰেন্দ্ৰ মোডীক ফোন কৰে। মোদীয়ে কয় যে দুয়োৰে মাজত শান্তি আলোচনা হৈছে। কিন্তু দেখা গ’ল যে এই ফোন কলৰ কিছু সময়ৰ পিছতে ইজৰাইলে ইৰাণত পুনৰ আক্ৰমণ কৰে।
উল্লেখ্য যে বৃহস্পতিবাৰৰ আক্ৰমণত ইজৰাইলে প্ৰায় ২০০খন জেট যুঁজাৰু বিমান আকাশত উৰুৱাইছিল। যুদ্ধবিমানসমূহৰ পৰা ৩৩০টাতকৈও অধিক বিভিন্ন ধৰণৰ বোমা নিক্ষেপ কৰা হয়। ইজৰাইলে ১০০ৰো অধিক ইৰাণৰ লক্ষ্যত আঘাত কৰে। তাতেই শেষ নহয়, প্ৰধানমন্ত্ৰী নেতানিয়াহুৱে এটা স্পষ্ট বাৰ্তা দিছিল যে এয়া এদিনীয়া আক্ৰমণ নহয়। এনেধৰণৰ আক্ৰমণ অব্যাহত থাকিব।
