গাজাত পুনৰ গোলাবৰ্ষণ কৰিছে ইজৰাইলী সেনাই। টেংকেৰে নিক্ষেপ কৰা টোপ বৰ্ষণত দক্ষিণ গাজাৰ ৰাফাহ অঞ্চলত ২৬ জন লোক নিহত হোৱাৰ লগতে ১৫০ জন আহত হৈছে। আমেৰিকাৰ পুঁজিৰে নিৰ্মাণ সাহায্য সামগ্ৰী বিতৰণ কেন্দ্ৰৰ ওচৰত সংঘটিত হৈছে এই ঘটনা।
ৰাফাহৰ স্থানীয় সাংবাদিক মহম্মদ ঘৰীবে জনোৱা মতে, আমেৰিকাই প্ৰেৰণ কৰা মানৱীয় সাহায্য বিতৰণ কেন্দ্ৰৰ ওচৰত হাজাৰ হাজাৰ পেলেষ্টাইনী লোক সমবেত হৈছিল। তাৰ পিছত ইজৰাইলৰ টেংকে সেই ঠাইলৈ লক্ষ্য কৰি গোলাবৰ্ষণ কৰিবলৈ ধৰে।
স্থানীয় সাংবাদিক আৰু কৰ্মীসকলে এই আক্ৰমণৰ দৃশ্য সামাজিক মাধ্যমত শ্বেয়াৰ কৰিছে।
এই আক্ৰমণৰ পিছত বহু আহত আৰু মৃত লোকক গাধৰ গাড়ীৰে আল-মাৱাছি অঞ্চলৰ ৰেড ক্ৰছ ফিল্ড হাস্পতাললৈ লৈ যোৱা হয়।
মহম্মদ ঘৰীবে কয় যে স্থানীয় সময় অনুসৰি পুৱা ৪:৩০ বজাত গাজা মানৱীয় ফাউণ্ডেশ্যনৰ দ্বাৰা পৰিচালিত এটা সাহায্য কেন্দ্ৰৰ সমীপত আল-আলম চৌহদৰ ওচৰত মানুহ গোট খাইছিল আৰু ইজৰাইলী টেংক আহি গুলীচালনা কৰিছিল।
তেওঁ কয়, “মৃত আৰু আহতসকল বহু সময়লৈকে মাটিত পৰি আছিল। অঞ্চলটো ইজৰাইলৰ নিয়ন্ত্ৰণত থকাৰ বাবে উদ্ধাৰকাৰী দল সেই অঞ্চলত উপস্থিত হ‘ব পৰা নাছিল। ইয়াৰ ফলত সাধাৰণ ৰাইজে গাধৰ গাড়ী ব্যৱহাৰ কৰি আহতসকলক ফিল্ড হস্পিতাললৈ লৈ যাবলৈ বাধ্য হয়।ৰেড ক্ৰছৰ ফিল্ড হাস্পতালে নিশ্চিত কৰিছে যে এই আক্ৰমণত ২৬ জন লোক নিহত হোৱাৰ লগতে ১৫০ জন আহত হৈছে।
