সন্দীপ ৰেড্ডী ভাংগা পৰিচালিত তথা ৰণবীৰ কাপুৰ অভিনীত বলীউডৰ ছবি ‘এনিমেল’- এ বিগত বৰ্ষত খলকনি তুলিলে বক্সঅফিছত। ছবিগৃ্হত অত্যন্ত সফলতাৰে চিনেমাখনে বিশ্বজুৰি প্ৰায় ৯০০ কোটি টকা উপাৰ্জন কৰিছে।
এনে সাফল্যৰ পিছতো অৱশ্যে চিনেমাখনক লৈ যথেষ্ট সমালোচনাও হৈছে। একাংশ দৰ্শক আৰু সমালোচকে ‘এনিমেল’ক চৰম পুৰুষতান্ত্ৰিক, নাৰীবিদ্বেষী আৰু নিৰ্মমভাৱে হিংসাত্মক বুলি অভিহিত কৰিছে।
তাৰ মাজতে প্ৰখ্যাত গীতিকাৰ তথা লেখক জাভেদ আখতাৰে কৰিছে এক বিশেষ মন্তব্য। এনিমেল ছবিৰ নাম নোলোৱাকৈয়ে জাভেদ আখতাৰে সমস্যাজনক দৃশ্য থকা ছবিৰ বাণিজ্যিক সফলতা এক বিপজ্জনক ধাৰা বুলি মন্তব্য কৰে।
চলিত সপ্তাহৰ আৰম্ভণিতে ঔৰংগাবাদত অনুষ্ঠিত অজন্তা এলোৰা আন্তঃৰাষ্ট্ৰীয় চলচ্চিত্ৰ মহোৎসৱত চিনেমাৰ সাম্প্ৰতিক অৱস্থাক লৈ উদ্বেগ প্ৰকাশ কৰি এইদৰে মন্তব্য কৰে ৭৮ বছৰীয়া চিত্ৰনাট্যকাৰগৰাকীয়ে।
আখতাৰৰ মতে, বৰ্তমানৰ যুৱ ছবি নিৰ্মাতাসকলৰ বাবে এয়া এক পৰীক্ষাৰ সময় যে তেওঁলোকে কেনেধৰণৰ চৰিত্ৰ সৃষ্টি কৰিব বিচাৰে, যিসমূহ চৰিত্ৰক দৰ্শকে পচন্দ কৰিব।
“উদাহৰণস্বৰূপে, যদি কোনো ছবিত এজন পুৰুষে এগৰাকী মহিলাক নিজৰ জোতা চেলেকিবলৈ কয় বা যদি কোনো পুৰুষে এগৰাকী মহিলাক চৰ মাৰিলেও ঠিকেই আছে বুলি কয় আৰু তাৰ পিছতো যদি ছবিখন ছুপাৰ ডুপাৰ হিট হয়, তেন্তে সেয়া অতি বিপজ্জনক।”- আখতাৰে কয়।
আপাত দৃষ্টিত কোনো ছবিৰ নাম উল্লেখ নকৰাকৈ জাভেদ আখতাৰে ‘এনিমেল’ৰ এটা মূল দৃশ্যৰ কথাই উল্লেখ কৰে। এনিমেলৰ এটা দৃশ্যত ছবিখনৰ মুখ্য চৰিত্ৰ ৰণবিজয়ে (ৰণবীৰ কাপুৰ) তেওঁৰ প্ৰেয়সী জ’য়া (তৃপ্তী ডিমৰী)ক তেওঁৰ প্ৰতি থকা প্ৰেম প্ৰমাণ কৰিবলৈ তেওঁৰ জোতা চেলেকিবলৈ কয়।
অৱশ্যে প্ৰবীণ চিত্ৰনাট্যকাৰগৰাকীয়ে লগতে কোনখন ছবি গ্ৰহণ কৰিব আৰু কোনখন ছবি প্ৰত্যাখ্যান কৰিব সেয়া নিৰ্ণয় কৰাৰ দায়িত্ব দৰ্শকৰ ওপৰত বুলি মন্তব্য কৰে। আখতাৰে লগতে চেলুলয়ডত এজন নায়কৰ প্ৰতিনিধিত্বক লৈ লেখকসকল যথেষ্ট প্ৰত্যাহ্বানৰ সন্মুখীন হৈছে বুলিও উল্লেখ কৰে।
দৰ্শকৰ মাজতে থকা বিভ্ৰান্তিৰ বাবে সম্প্ৰতি লেখকসকলে পৰ্দাত কেনেকুৱা নায়কক উপস্থাপন কৰিব সেই লৈ বিভ্ৰান্তিত পৰিছে বুলি মন্তব্য কৰে জাভেদ আখতাৰে। তেওঁৰ মতে মূলতঃ দৰ্শকেই চৰিত্ৰৰ উপস্থাপনত মুখ্য ভূমিকা লয়।
“যেতিয়া দৰ্শকে কি সঠিক আৰু কি ভুল সেই বিষয়ে স্পষ্ট হয়, তেতিয়া লেখকসকলে ডাঙৰ চৰিত্ৰসমূহ অন্তৰ্ভুক্ত কৰে। কিন্তু যেতিয়া দৰ্শকে কি উচিত আৰু কি ভুল বুজিব নোৱাৰে, তেতিয়া লেখকসকলে মহান চৰিত্ৰ সৃষ্টি কৰিব নোৱাৰে।”- জাভেদ আখতাৰে লগতে কয়।
