ভাৰতত বিজেপিয়ে বিহাৰৰ নিৰ্বাচনী ইস্তাহাৰত জনসাধাৰণক বিনামূলীয়াকৈ কৰ’না ভেকচিন দিয়াৰ প্ৰতিশ্ৰুতি দিয়াৰ বিষয়টোৱে ইতিমধ্যে প্ৰতিক্ৰিয়াৰ সৃষ্টি কৰিছে।
কৰ’নাৰ ভেকচিন বজাৰলৈ অহাটো নিশ্চিত হোৱাৰ পূৰ্বেই এইদৰে বিনামূলীয়া ভেকচিন দিয়াৰ ৰাজনীতি আৰম্ভ কৰাক লৈ সৰৱ হৈ পৰিছে বিভিন্ন দল-সংগঠন।
আমেৰিকা যুক্তৰাষ্ট্ৰৰ ৰাষ্ট্ৰপতি নিৰ্বাচনৰ প্ৰচাৰতো কৰ’না ভাইৰাছৰ প্ৰসংগই গুৰুত্ব লাভ কৰা দেখা গৈছে।
আমেৰিকাৰ ৰাষ্ট্ৰপতি ডোনাল্ড ট্ৰাম্পৰ সৈতে চূড়ান্ত মুখামুখি বিতৰ্কৰ পাছতেই কৰ’না ভাইৰাছ মোকাবিলাৰ ক্ষেত্ৰত নিজৰ পৰিকল্পনাৰ কথা ব্যক্ত কৰিছে ডেম’ক্ৰেট প্ৰাৰ্থী জো বিডেনে।
শুকুৰবাৰে জো বিডেনে কয় যে আমেৰিকাৰ ৰাষ্ট্ৰপতি নিৰ্বাচিত হ’লে তেওঁ মাস্ক পৰিধান কৰাটো বাধ্যতামূলক কৰিব আৰু প্ৰত্যেককে বিনামূলীয়াকৈ কৰ’না ভাইৰাছৰ ভেকচিন প্ৰদান কৰিব।
কৰ’না মোকাবিলাৰ পৰিকল্পনাৰ কথা দাঙি ধৰি বিডেনে কয় যে এটা সুৰক্ষিত তথা কাৰ্যকৰী ভেকচিন প্ৰস্তুত হ’লেই সেয়া প্ৰত্যেককে বিনামূলীয়াকৈ প্ৰদান কৰা হ’ব।
অৱশ্যে, আমেৰিকানসকলৰ বাবে ভেকচিন বিস্তৃতভাৱে সুলভ হৈ উঠালৈ এতিয়াও বহু কেইমাহ বাকী আছে বুলিও তেওঁ কয়।
বিডেনে লগতে কয় যে সকলো আমেৰিকানৰ বাবে যথেষ্ট পিপিই কিট আৰু জৰুৰী আহিলা-পাতি সৰবৰাহৰ পৰিকল্পনাও তেওঁৰ আছে।
অহা ৩ নৱেম্বৰত আমেৰিকাৰ ৰাষ্ট্ৰপতি নিৰ্বাচন অনুষ্ঠিত হ’ব। ইয়াৰ পূৰ্বে বৃহস্পতিবাৰে নিৰ্বাচনৰ শেষ পৰ্যায়ৰ ৰাষ্ট্ৰপতিৰ প্ৰাৰ্থীৰ বিতৰ্ক অনুষ্ঠিত হৈ যায়।
