সংসদত নাগৰিকত্ব সংশোধনী বিধেয়ক গৃহীত কৰাৰ বাবে কেন্দ্ৰ গ্ৰহণ কৰা পদক্ষেপৰ বিৰুদ্ধে সোমবাৰে যোৰহাটত আছুৱে এক প্ৰতিবাদী সমদল উলিয়ায়।
নাগৰিকত্ব সংশোধনী বিধেয়ক ২০১৯’ৰ ৮ জানুৱাৰিত লোকসভাত গৃহীত হয় যদিও উত্তৰ-পূৰ্বাঞ্চলত ইয়াৰ বিৰুদ্ধে ব্যাপক প্ৰতিবাদ হোৱাৰ বাবে বিধেয়কখন ৰাজ্যসভাত উত্থাপন তথা গৃহীত কৰিব নোৱাৰিলে।
প্ৰতিবাদী সমদলটোৰ নেতৃত্ব দিয়ে আছুৰ কেন্দ্ৰীয় সমিতিৰ সাংগঠনিক সম্পাদক জুল খাউণ্ড আৰু আৰু কেন্দ্ৰীয় কাৰ্যনিৰ্বাহকৰ সদস্য সূৰ্য কুমাৰ ভূঞাই।
প্ৰতিবাদকাৰীসকলে হাতে হাতে বেনাৰ লৈ নৰেন্দ্ৰ মোদী নেতৃত্বাধীন কেন্দ্ৰীয় চৰকাৰ, আৰ এছ এছ, বিজেপি, অসমৰ মুখ্য মন্ত্ৰী সৰ্বানন্দ সোণোৱাল আৰু কেন্দ্ৰীয় গৃহ মন্ত্ৰী অমিত শ্বাহৰ বিৰুদ্ধে শ্ল’গান দিয়ে।
মুখ্য মন্ত্ৰী সোণোৱালক সমালোচনা কৰি খাউণ্ডে কয়,’’এসময়ত আছুৰ শীৰ্ষ নেতা হিচাপে থকা সোণোৱালে এতিয়া ক্ষমতাৰ বাবেই ৰাজ্যখনত বিদেশীৰ বিৰুদ্ধে দিয়া তেওঁৰ সেই শ্ল’গান পাহৰি গৈছে।‘’
উল্লেখযোগ্য যে আছুৰ নেতৃত্বত অবৈধ বিদেশী অনুপ্ৰৱেশকাৰীৰ বিৰুদ্ধে চলা ছয় বছৰীয়া অসম আন্দোলনৰ সোণোৱালো অন্যতম অংশগ্ৰহণকাৰী আছিল।
অসম গণ পৰিষদৰ নেতা হিচাপেও অসমত প্ৰযোজ্য হৈ থকা আই এম ডি টি আইন বাতিলৰ বাবে উচ্চতম ন্যায়ালয়ত যুঁজ দিছিল।
প্ৰতিবাদকাৰীসকলে কয় যে ছাত্ৰ সংগঠনটোৱে বিধেয়কখন বাতিল নকৰালৈকে ইয়াৰ বিৰুদ্ধে প্ৰতিবাদ কৰি যাব কিয়নো বিধেয়কখন গৃহীত হ’লে খিলঞ্জীয়া অসমীয়া জনসাধাৰণৰ কলা,সংস্কৃতি, ভাষা, পৰিচয়ৰ প্ৰতি তীব্ৰ ভাবুকিৰ সৃষ্টি কৰিব।
প্ৰতিবাদী কাৰ্যসূচীত যোৰহাট জিলা আছুৰ উপ সভাপতি দিগন্ত বৰা, সাধাৰণ সম্পাদক জিতু নেওগ আৰু সহকাৰী সাধাৰণ সম্পাদক বিজয় শংকৰ বৰদলৈও উপস্থিত আছিল।
