মঙলবাৰে নিশা চেন্নাইত এখন তীব্ৰবেগী গাড়ীৰ খুন্দাত নিহত হয় এগৰাকী সাংবাদিক।
খবৰ অনুসৰি, সাংবাদিকগৰাকীয়ে মটৰ চাইকেল চলাই গৈ থকাৰ অৱস্থাত এখন তীব্ৰবেগী বি এম ডব্লিউ বাহনে পিছ ফালৰ পৰা খুন্দা মাৰে। প্ৰায় ১০০ মিটাৰ দূৰলৈ মটৰ চাইকেলখন চোচঁৰাই লৈ যায় গাড়ীখনে। ফলত থিতাতে সাংবাদিকগৰাকী নিহত হয়।
মাদুৰাভয়ল-তাম্বাৰম উচ্চ বাইপাছত সংঘটিত হয় এই দুৰ্ঘটনাটো।
পণ্ডী বজাৰৰ বাসিন্দা প্ৰদীপ কুমাৰ নামৰ সাংবাদিকগৰাকী এটা তেলেগু চেনেলৰ জ্যেষ্ঠ ভিডিঅ’ জাৰ্নেলিষ্ট। লগতে, চেন্নাই মহানগৰীত তেওঁ পাৰ্ট টাইম ৰেপিডো চালক হিচাপেও কাম কৰিছিল।
অভিযোগ অনুসৰি, দুৰ্ঘটনা সংঘটিত হোৱাৰ পিছতে গাড়ীখনৰ চালক পলায়ন কৰে।
স্থানীয় লোকসকলে পৰিত্যক্ত বাহনখন লক্ষ্য কৰাৰ পিছতে আৰক্ষীক এই দুৰ্ঘটনাৰ বিষয়ে খবৰ দিয়ে। পিছত আৰক্ষীয়ে সেই স্থানত উপস্থিত হৈ ক্ষতিগ্ৰস্ত দুচকীয়া বাহনখন উদ্ধাৰ কৰে।
খুন্দিওৱা স্থানৰ পৰা ১০০ মিটাৰ দূৰত তেওঁৰ মৃতদেহ উদ্ধাৰ হোৱাৰ পিছতহে প্ৰদীপ কুমাৰৰ মৃত্যুৰ কথা পোহৰলৈ আহে।
নিৰুদ্দেশ হোৱা বিলাসী গাড়ী চালকজনৰ সন্ধানত আৰক্ষীয়ে তৎপৰতা অব্যাহত ৰাখিছে, আৰু অধিক তদন্ত অব্যাহত আছে।
