কাইলৈ হ’ল লগীয়া নাগৰিকত্ব বিধেয়ক সম্পৰ্কীয় যুটীয়া সংসদীয় কমিটীৰ বৈঠকৰ কেইঘণ্টামান পূৰ্বে কমিটীখনৰ অধ্যক্ষ ৰাজেন্দ্ৰ আগ্ৰৱালে ইয়াৰ প্ৰতিজন সদস্যৰ মত লোৱাৰ প্ৰতিশ্ৰুতি বেকত কৰিছে।
আজি নতুন দিল্লীত সংবাদ মাধ্যমৰ আগত কয় যে প্ৰতিবেদন প্ৰস্তুত কৰাৰ পূৰ্বে কমিটীখনৰ ৩০জন সদস্যৰ প্ৰতিজনৰে মত লোৱা হ’ব।
আনহাতে অসমৰ জনগণৰ বিধেয়কখনক লৈ থকা শংকাৰ কথা আৰু তেওঁলোকৰ প্ৰতিবাদৰ কথা প্ৰতিবেদনত সংলগ্ন কৰা হ’ব বুলিও প্ৰতিশ্ৰুতি দিয়ে। আজি তেওঁক সাক্ষাৎ কৰা অগপৰ প্ৰতিনিধিকেইজনৰ আগত এইদৰে প্ৰতিশ্ৰুতি দিয়ে অগ্ৰৱালে। “অসমৰ সকলো জ্বলন্ত সমস্যাক প্ৰতিবেদনত অন্তৰ্ভুক্ত কৰা হ’ব। লগতে আমি বিধেয়কখন সন্দৰ্ভত সকলো সদস্যৰ মতামত ল’ম।” এইদৰে কয় ৰাজেন্দ্ৰ অগ্ৰৱালে।
উল্লেখযোগ্য যে অসমৰ পৰা যোৱা অগপৰ প্ৰতিনিধিকেইজনে আজি অধ্যক্ষজনক সাক্ষাৎ কৰিছিল আৰু বিতৰ্কিত বিধেয়কখন সন্দৰ্ভত তেওঁলোকৰ বিৰোধিতাৰ কথা দোহাৰিছিল। কাইলৈ বিধেয়কখনৰ বিষয়ত কমিটীখনৰ বৈঠক অনুষ্ঠিত হ’ব। কমিটীখন লোকসভাৰ ২০ আৰু ৰাজ্যসভাৰ ১০জন, মুঠ ৩০জন সাংসদেৰে গঠিত।
দলটোৰ সূত্ৰই জনোৱা মতে, ইয়াৰ পূৰ্বে অগপৰ প্ৰতিনিধিকেইজনে যুটীয়া সংসদীয় সমিতিৰ সদস্য স্বপন দাশগুপ্তক সাক্ষাৎ কৰে। প্ৰতিনিধিসকলৰ মাজত আছিল সভাপতি অতুল বৰা, কেশৱ মহন্ত, ফণিভূষণ চৌধুৰী, বীৰেন্দ্ৰ প্ৰসাদ বৈশ্য আৰু ৰমেন্দ্ৰ নাৰায়ণ কলিতা।
প্ৰসংগক্ৰমে উল্লেখ কৰিব পাৰি যে প্ৰস্তাৱিত নাগৰিকত্ব সংশোধনী বিধেয়কখনৰ বিৰোধিতা কৰি আৰু এইখন বাতিলৰ দাবীত অসমত ধাৰাবাহিকভাৱে প্ৰতিবাদ হৈ আহিছে। ৰাজ্যত মিত্ৰতাৰে চৰকাৰত থকা দল অগপয়ো বিধেয়কখনৰ বিৰোধিতা কৰি আহিছে।
