শেহতীয়াকৈ ৰাষ্ট্ৰপতি দ্ৰৌপদী মুৰ্মুৱে পাঁচখন উচ্চ ন্যায়ালয়ৰ মুখ্য ন্যায়াধীশ নিযুক্তি প্ৰদান কৰে। কেন্দ্ৰীয় আইন আৰু ন্যায় মন্ত্ৰালয়ৰ অধিসূচনা অনুসৰি, মধ্যপ্ৰদেশ, ঝাৰখণ্ড, কৰ্ণাটক, গুৱাহাটী আৰু পাটনা উচ্চ ন্যায়ালয়ৰ বাবে নতুন মুখ্য ন্যায়াধীশ নিযুক্ত কৰা হৈছে। এই তালিকা অনুসৰি, গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে ন্যায়াধীশ আশুতোষ কুমাৰক নিযুক্তি দিয়া হৈছে।
উল্লেখ্য যে আশুতোষ কুমাৰে পূৰ্বে পাটনা উচ্চ ন্যায়ালয়ৰ ভাৰপ্ৰাপ্ত মুখ্য ন্যায়াধীশ হিচাপে কাৰ্যনিৰ্বাহ কৰি আছিল। ইয়াৰ সমান্তৰালভাৱে, মধ্যপ্ৰদেশৰ ভাৰপ্ৰাপ্ত মুখ্য ন্যায়াধীশ সঞ্জীৱ সচদেৱক মধ্যপ্ৰদেশ উচ্চ ন্যায়ালয়ৰ মুখ্য ন্যায়াধীশ, দিল্লীৰ ন্যায়াধীশ বিভু বাখ্ৰুক কৰ্ণাটক উচ্চ ন্যায়ালয়ৰ মুখ্য ন্যায়াধীশ, পাটনাৰ ন্যায়াধীশ বিপুল মনুভাই পাঞ্চোলিক পাটনা উচ্চ ন্যায়ালয়ৰ মুখ্য ন্যায়াধীশ আৰু হিমাচল প্ৰদেশৰ ন্যায়াধীশ তাৰলক সিং চৌহানক ঝাৰখণ্ড উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি প্ৰদান কৰা হৈছে।
উচ্চতম ন্যায়ালয়ৰ মুখ্য ন্যায়াধীশ বি আৰ গাভাইৰ নেতৃত্বত গঠিত কলেজিয়ামে এই ন্যায়াধীশসকলক পদোন্নতি আৰু বিভিন্ন উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তিৰ পৰামৰ্শ দিছিল। তাৰ পিছত ৰাষ্ট্ৰপতিয়ে এই নিযুক্তিসমূহৰ অনুমোদন জনায়।
ইয়াৰ লগতে কেইজনমান ন্যায়াধীশক বদলিও কৰা হৈছে। মনিন্দ্ৰ মোহন শ্ৰীবাস্তৱক ৰাজস্থান উচ্চ ন্যায়ালয়ৰ পৰা মাদ্ৰাজ উচ্চ ন্যায়ালয়ৰ মুখ্য ন্যায়াধীশ, অপৰেশ কুমাৰ সিঙক ত্ৰিপুৰা উচ্চ ন্যায়ালয়ৰ পৰা তেলেংগানা উচ্চ ন্যায়ালয়ৰ মুখ্য ন্যায়াধীশ, এম এছ ৰামচন্দ্ৰ ৰাওক ঝাৰখণ্ড উচ্চ ন্যায়ালয়ৰ পৰা ত্ৰিপুৰা উচ্চ ন্যায়ালয়ৰ মুখ্য ন্যায়াধীশ আৰু কে আৰ শ্ৰীৰামক মাদ্ৰাজ উচ্চ ন্যায়ালয়ৰ পৰা ৰাজস্থান উচ্চ ন্যায়ালয়ৰ মুখ্য ন্যায়াধীশ হিচাপে বদলি কৰা হৈছে।
