গোলাঘাটৰ উৰিয়ামঘাটত চলি থকা উচ্ছেদ অভিযানত মুখ থেকেচা খালে হিমন্ত বিশ্ব শৰ্মাই। গুৱাহাটী উচ্চ ন্যায়ালয়ে ১৪ আগষ্টলৈকে এই উচ্ছেদ অভিযান স্থগিত ৰাখিবলৈ চৰকাৰক নিৰ্দেশ দিছে।
উল্লেখ্য যে এই উচ্ছেদৰ বিৰুদ্ধে ৭৫ টা পৰিয়ালে কাষ চাপিছিল উচ্চ ন্যায়ালয়ৰ। সেই আবেদন অনুসৰি ন্যায়ালয়ে মঙলবাৰে এই উচ্ছেদ স্থগিত ৰাখিবলৈ নিৰ্দেশ দিছে।
আবেদনকাৰীসকলে যুক্তি দিছিল যে তেওঁলোকক অবৈধ ভূমি দখলকাৰী বুলি যি ঠাইৰ পৰা উচ্ছেদ কৰিব খোজা হৈছে সেই ঠাইত তেওঁলোকে দশক দশক ধৰি বসবাস কৰি আহিছে আৰু এই ভূমি কেতিয়াও বনাঞ্চল বা ৰাজহ ভূমি বুলি আইনগতভাবে তেওঁলোকে কেতিয়াও অৱগত হোৱা নাই।
তেওঁলোকে আদালতত কয় যে তেওঁলোকৰ ঘৰবোৰ বেদখল নহয়, বৰঞ্চ বছৰ বছৰ ধৰি ক্ৰমান্বয়ে গঢ় লৈ উঠা বন্দোবস্তৰ অংশ আছিল। তেওঁলোকে সেই ঠাইত থাকি পিএমএৱাইৰ গৃহ, বিদ্যুৎ সংযোগ, আৰু অন্যান্য নাগৰিক সুবিধাকে ধৰি চৰকাৰী আঁচনিৰ সম্পূৰ্ণ সুবিধা লাভ কৰিছিল।
তেওঁলোকৰ আবেদনত এই কথাত গুৰুত্ব আৰোপ কৰা হৈছিল যে চৰকাৰে তেওঁলোকক মাত্ৰ ৭ দিনৰ সময়সীমা বান্ধি দি উচ্ছেদৰ জাননী দিছিল। তেওঁলোকক তেওঁলোকৰ আৱাসিক অধিকাৰৰ প্ৰমাণ বা আইনী নথি দাখিল কৰাৰ কোনো উপযুক্ত সুযোগ দিয়া হোৱা নাছিল।
এই যুক্তি শুনাৰ পিছত মুখ্য ন্যায়াধীশৰ নেতৃত্বত এখন সংমণ্ডল বিচাৰপীঠে অসম চৰকাৰক ১৪ আগষ্টৰ ভিতৰত এখন বিস্তৃত শপতনামা দাখিল কৰিবলৈ নিৰ্দেশ দিয়ে। এই শপতনামত ভূমিৰ আইনী শ্ৰেণীবিভাজনৰ স্পষ্ট সংজ্ঞা দিব লাগিব, ভূমি অধিগ্ৰহণ কৰা ব্যৱস্থাৰ সময়সীমা দিব লাগিব। ভূমিৰ সঠিক সীমা নিৰ্ধাৰণ কৰাৰ লগতে জাননী জাৰি কৰা হৈছে নে নাই সেই বিষয়ে ব্যাখ্যা কৰিব লাগিব।
একে সময়তে আদালতে আবেদনকাৰীসকলক আৱাসিক অধিকাৰৰ প্ৰমাণ, নথিপত্ৰ, ভূমি আবণ্টনৰ পত্ৰ, ইউটিলিটি বিল, আৰু কল্যাণমূলক নামভৰ্তিৰ কাগজ দাখিল কৰিবলৈ নিৰ্দেশ দিয়ে।
