শেহতীয়াকৈ ভাৰতীয় টেলিভিছনৰ অন্যতম জনপ্ৰিয় ৰিয়েলিটি শ্ব’ ‘কৌন ব’নেগা কড়োৰপতি’(কেবিচি)ৰত বৃহৎ সালসলনি হোৱা বুলি জল্পনা-কল্পনা বিয়পি পৰিছে। ইণ্টাৰনেটত চৰ্চা চলিছে যে, অমিতাভ বচ্চনৰ পৰিৱৰ্তে ছলমান খানক সূত্ৰধাৰ হিচাপে দেখা যাব পাৰে।
যদিও এই বিষয়টো সন্দৰ্ভত এতিয়ালৈকে শ্ব’ কৰ্তৃপক্ষ বা চেনেলৰ পৰা কোনো আনুষ্ঠানিক ঘোষণা হোৱা নাই, তথাপিও ছলমান খানৰ অনুৰাগীৰ এটা অংশই তেওঁক ‘বিগ বছ’ৰ আয়োজক বাদ দি ‘কেবিচি’লৈ আহিবলৈ দাবী জনাইছে। দীৰ্ঘদিন ধৰি জনপ্ৰিয় ৰিয়েলিটি শ্ব’ ‘বিগ বছ’ হোষ্ট কৰি আহিছে ছলমানে।
বলীউডৰ শ্বেহেনশ্বাহ অমিতাভ বচ্চনে ২০০০ চনৰ পৰা আৰম্ভ হোৱা প্ৰথম ছিজনৰ পৰাই আয়োজন কৰি আহিছে ‘কৌন ব’নেগা কড়োৰপতি’। বিগ বিৰ অনন্য উপস্থাপন শৈলীয়ে অনুষ্ঠানটোক দৰ্শকৰ মাজত অত্যন্ত জনপ্ৰিয় কৰি তুলিছে।
যদিও শ্বাহৰুখ খানে এটা ছিজনৰ বাবে এই অনুষ্ঠানটো হোষ্ট কৰিছিল, তথাপিও দৰ্শকৰ মাজত ইমান জনপ্ৰিয় নাছিল।
যদি নেটিজেনৰ মাজত চলা এই জল্পনা-কল্পনা সঁচা হয় আৰু এই সালসলনি হয় তেন্তে ছলমান খানে সৰু পৰ্দাত আন এটা জনপ্ৰিয় অনুষ্ঠানৰ দায়িত্ব ল’ব। অৱশ্যে এতিয়া প্ৰশ্ন হৈছে বিগ বিৰ অনুপস্থিতিত এই ৰিয়েলিটি শ্ব’টো কিমান গ্ৰহণযোগ্য হ’ব আৰু দৰ্শকৰ প্ৰতিক্ৰিয়া কি হ’ব তাক লৈ প্ৰশ্ন উত্থাপ্ন হৈছে।
