পৰ্যটকৰ আকৰ্ষণৰ কেন্দ্ৰবিন্দু কাজিৰঙা ৰাষ্ট্ৰীয় উদ্যানত অহা এপ্ৰিল মাহত দুদিনৰ বাবে বন্ধ থাকিব হাতী আৰু জীপ ছাফাৰী। কাজিৰঙাত অনুষ্ঠিত হ’বলগীয়া ‘গজ উৎসৱ ২০২৩’ ৰ কাৰণে পৰ্যটকৰ বাবে উপলব্ধ নহ’ব এই সুবিধা।
পূব অসমৰ বন্যপ্ৰাণী সংমণ্ডলৰ বন বিষয়া – ৰমেশ গগৈয়ে সদৰী কৰা মতে অহা ৬ আৰু ৭ এপ্ৰিলত অনুষ্ঠিত হ’ব দুদিনীয়া “গজ উৎসৱ-২০২৩”। এই উপলক্ষে ৰাষ্ট্ৰীয় উদ্যানখনত বন্ধ থাকিব হাতী আৰু জীপ ছাফাৰী।
তেওঁ উল্লেখ কৰা মতে কাজিৰঙা ৰাষ্ট্ৰীয় উদ্যানৰ কহৰা, বাগৰী, বুঢ়াপাহাৰ আৰু অগৰাতলি ৰেঞ্জত পৰ্যটকৰ বাবে ছাফাৰীৰ সুবিধা এই দিন দুটাত বন্ধ কৰা হ’ব।
উল্লেখ্য যে, ‘গজ উৎসৱ’ হৈছে কাজিৰঙা ৰাষ্ট্ৰীয় উদ্যানত আয়োজন কৰা বাৰ্ষিক অনুষ্ঠান। এছিয়াটিক হাতীৰ সুৰক্ষা আৰু সংৰক্ষণৰ লগতে অসমত ক্ৰমাৎ বৃদ্ধি পোৱা মানুহ-হাতী সংঘাতৰ সমাধানৰ উপায় বিচাৰি উলিওৱাৰ উদ্দেশ্যে এই অনুষ্ঠানৰ আয়োজন কৰা হৈছে।
প্ৰকাশিত খবৰ অনুসৰি, ‘গজ উৎসৱ-২০২৩’ত দেশৰ ৰাষ্ট্ৰপতি দ্ৰৌপদী মুৰ্মুয়ে অংশগ্ৰহণ কৰাৰ সম্ভাৱনা আছে।
