২০১১ চনৰ বিশ্বকাপৰ খিতাপ দখলৰ মূল নায়ক যুৱৰাজ সিঙে সোমবাৰে আন্তঃৰাষ্ট্ৰীয় ক্ৰিকেট, আই পি এলৰ লগতে ঘৰুৱা ক্ৰিকেটৰ পৰা অৱসৰ গ্ৰহণ কৰে। বাঁওহতীয়া ষ্টাইলিষ্ট বেটছমেন গৰাকীৰ এই ঘোষণাৰ পিছৰে পৰা ক্ৰিকেট জগতৰ লগত জৰিত তথা অন্য বহুতে তেওঁক টুইটাৰ তথা সামাজিক মাধ্যমৰ জৰিয়তে বৰ্ণময় কেৰিয়াৰৰ কথা সোঁৱৰণ কৰে।
ভাৰতীয় ক্ৰিকেটৰ এই গৰাকী মেচ উইনাৰৰ এই সিদ্ধান্তক ৰাজনীতি জগতৰো বিভিন্ন জনে আদৰণি জনোৱাৰ লগতে ভৱিষ্যতৰ দিনবোৰৰ বাবে শুভেচ্ছা প্ৰদান কৰে। এই ক্ষেত্ৰত ক্ৰীড়া আৰু যুৱ কল্যাণ বিভাগৰ (স্বতন্ত্ৰ) ৰাজ্য মন্ত্ৰী কিৰেন ৰিজিজু আৰু কেন্দ্ৰীয় গৃহ মন্ত্ৰী অমিত শ্বাহে বিশেষভাৱে শুভেচ্ছা প্ৰদান কৰে ক্ৰিকেটাৰ গৰাকীক।
এক টুইটত ৰিজিজুৱে যুৱৰাজ সিং সন্দৰ্ভত লিখে, ‘যুৱৰাজ সিং, তুমি ক্ৰিকেট খেলবিধৰ পৰা অৱসৰ গ্ৰহণ কৰিব পাৰা কিন্তু তুমি সদাই ভাৰতীয় ক্ৰিকেট প্ৰেমী তথা বিশ্বৰ বহুতৰ বাবে ক্ৰিকেটিং আইকন হৈ ৰ’বা। অসাধাৰণ আছিল তোমাৰ বেটিং, বলিং আৰু ফিল্ডিং। তোমাক লৈ আমি গৌৰৱান্বিত। ভৱিষ্যতৰ দিনবোৰৰ বাবে তোমাক মোৰ তৰফৰ পৰা অজস্ৰ শুভেচ্ছা জনাইছো’।
Dear Yuvraj Singh, you may have retired from the competitive cricket game but you will remain a cricketing icon for every Indian & millions across the globe. What a batsman, bowler & fielder you have been!
We are proud of you?
I extend my best wishes for your future endeavours! pic.twitter.com/mYc4iUgH21— Kiren Rijiju (@KirenRijiju) June 10, 2019
উল্লেখ্য যে ভাৰতৰ এই গৰাকী ক্ৰিকেটাৰে ১৭ বছৰীয়া আন্তঃৰাষ্ট্ৰীয় কেৰিয়াৰত ৩০৪খন এদিনীয়া, ৪০খন টেষ্ট আৰু ৫৮ খন টি-২০ মেচ খেলিছিল। ২০০৭ টি-২০ বিশ্বকাপ আৰু ২০১১ এদিনীয়া বিশ্বকাপ জয়ী দলৰ সদস্য আছিল তথা দুয়োটা বিশ্বকাপতে যুৱৰাজে ‘মেন অব দ্য টুৰ্ণামেণ্ট’ৰ সন্মান পাবলৈ সক্ষম হৈছিল।
আন্তঃৰাষ্ট্ৰীয় কেৰিয়াৰত ৪০০ৰো অধিক মেচ খেলা যুৱৰাজ সিঙে টেষ্টত ১,৯০০ ৰান, এদিনীয়াত ৮,৭০১ ৰান আৰু টি-২০ত ১,১৭৭ ৰান সংগ্ৰহ কৰিছে। তদুপৰি টেষ্টত ৯, এদিনীয়াত ১১১ আৰু টি-২০ত ২৮টা উইকেট দখল কৰিছে।
