নাগৰিকত্ব সংশোধনী বিধেয়ক প্ৰতিহত কৰাৰ উদ্দেশ্যে ৰাহুল গান্ধীকে ধৰি বিৰোধী দলৰ নেতাক লগ ধৰিবলৈ যোৱা ৩১ জানুৱাৰিৰ পৰা দিল্লীত বাহৰ পাতি থকা অখিল গগৈ সোমবাৰে নিশা আঁঠুৰ তলত প্ৰচণ্ড বিষত অসুস্থ হৈ দিল্লীৰ আদিভা হস্পিতালত ভৰ্তি হ’ব লগীয়া হয়।
সোঁ ভৰিৰ ক’লা ফুলৰ তলৰভাগ ফুলি উঠা অখিলক চিকিৎসকে ততাতৈয়াকৈ তেজ পৰীক্ষাকে ধৰি বিভিন্ন ধৰণৰ পৰীক্ষা কৰোৱাই। পৰীক্ষাৰ অন্তত বীজানুৰ সংক্ৰমণৰ ফলতেই এনে হোৱা বুলি চিকিৎসকে কয় বুলি তেওঁৰ সতীৰ্থ তথা অনুসূচিত জাতি ছাত্ৰ সন্থাৰ সভাপতি ৰুবুল দাসে জানিবলৈ দিয়ে।
‘দিল্লীত ঠাণ্ডাৰ প্ৰকোপ বেছি তথাপি অহৰহ হাৱাই চেণ্ডেল পিন্ধি থকাৰ বাবে তেওঁৰ ভৰিত বীজাণুৰ সংক্ৰমণ হোৱা বুলি চিকিৎসকে জনাইছে।‘ দাসে এইদৰে কয়।
দাসে জানিবলৈ দিয়া মতে ‘কাইলৈ তেওঁক হস্পিতালৰ পৰা ৰিলিছ দিয়াৰ কিছু সম্ভাৱনা আছে। চিকিৎসালয়ৰ পৰা ৰিলিছ দিলেও কিছুদিন তেওঁক জিৰণিৰ প্ৰয়োজনীয়তা আছে বুলি চিকিৎসকে জনাইছে।‘
কৃষক নেতাগৰাকী এইদৰে অসুস্থ কাষত তেওঁৰ সতীৰ্থসকলৰ লগতে অসমৰ পৰা অধ্যয়নৰ বাবে যোৱা একাংশ ছাত্ৰ-ছাত্ৰীয়েও চিকিৎসালয়খনত গৈ তেওঁৰ স্বাস্থ্যৰ খবৰ লয়।
