শিশু সৰবৰাহৰ গোচৰত গ্ৰেপ্তাৰ কলকাতাৰ দন্ত চিকিৎসক; দুটা শিশু উদ্ধাৰ
দুটা শিশুৰ সৰবৰাহৰ অভিযোগত শনিবাৰে মুম্বাই আৰক্ষীয়ে কলকাতাৰ এগৰাকী মহিলা দন্ত চিকিৎসকক গ্ৰেপ্তাৰ কৰিছে। ৱাডালা ট্ৰাক টাৰ্মিনাছ আৰক্ষী থানাৰ এটা দলে অভিযুক্ত ৰেশমা সন্তোষ কুমাৰ বেনাৰ্জীক যোৱা সপ্তাহত গ্ৰেপ্তাৰ কৰে। এই অভিযানত এজন দুবছৰীয়া ল’ৰা আৰু এগৰাকী তিনি বছৰীয়া কন্যা শিশুক উদ্ধাৰ কৰা হয়। আৰক্ষীৰ মতে, ২০২৪ চনৰ মে’ মাহত এজন ঠিকাদাৰে তেওঁৰ জোঁৱাই আৰু শিশু নাতি অপহৰণৰ অভিযোগ লৈ আৰক্ষীৰ কাষ চাপিছিল।
তদন্তত জানিব পৰা গৈছে যে অভিযোগকাৰীৰ জোঁৱায়েকে শিশুটিক ১.৬ লাখ টকাত আছমা শ্বেইখ, শ্বৰীফ শ্বেইখ আৰু আশা পাৱাৰ নামৰ তিনিজন অভিযুক্তক বিক্ৰী কৰিছিল। ইয়াৰ পিছত আৰক্ষীয়ে শিশুটিৰ পিতৃ আৰু এই তিনিজনক গ্ৰেপ্তাৰ কৰে।
আৰক্ষীৰ সূত্ৰ আনুসৰি ল’ৰাটোক ওড়িশাৰ ভুৱনেশ্বৰ ৰে’ল ষ্টেচনত এগৰাকী মহিলাক বিক্ৰী কৰা হৈছিল। মহিলাগৰাকী ভুবনেশ্বৰৰ এখন দন্ত চিকিৎসালয়ত কাম কৰে বুলি তদন্তত পোহৰলৈ আহে। পিছত কলকাতাত তেওঁৰ বিষয়ে সবিশেষ তথ্য লাভ কৰে।
আৰক্ষীয়ে অভিযুক্ত মহিলাগৰাকীক গ্ৰেপ্তাৰ কৰি অভিযোগকাৰীৰ নাতি আৰু এগৰাকী অচিনাক্ত তিনি বছৰীয়া কন্যা শিশুক উদ্ধাৰ কৰে। উদ্ধাৰ কৰা শিশু দুয়োজনৰ শৰীৰত আঘাতৰ চিন দেখা গৈছিল, যাৰ বাবে তেওঁলোকক চিকিৎসাৰ বাবে হাস্পতালত ভৰ্তি কৰা হয়।
এই ঘটনাই শিশু সৰবৰাহৰ এক বৃহৎ নেটৱৰ্কৰ উপস্থিতিৰ ইংগিত বহন কৰিছে আৰু আৰক্ষীয়ে এতিয়া এই গোচৰৰ তদন্ত অব্যাহত ৰাখিছে।