সুস্থ জীৱনৰ বাবে টোপনিৰ গুৰুত্ব অপৰিসীম, কিন্তু সাম্প্ৰতিক সময়ৰ জীৱনশৈলীত টোপনিৰ অভাৱে মানসিক স্বাস্থ্যৰ ওপৰত প্ৰভাৱ পেলাইছে। গৱেষণাৰ মতে, ভাল টোপনিৰ অভাৱে মানসিক স্বাস্থ্যৰ অৱনতি ঘটায়, যাৰ ফলত হতাশা, উদ্বেগ, স্মৃতিশক্তিৰ দুৰ্বলতা আৰু মেজাজৰ অস্থিৰতাৰ দৰে সমস্যাৰ সৃষ্টি হয়। চিকিৎসকৰ মতে অপৰ্যাপ্ত টোপনিয়ে মগজুক জিৰণি আৰু তথ্য প্ৰক্ৰিয়াকৰণৰ সুযোগ নিদিয়ে, যাৰ ফলত মানসিক ভাৰসাম্য বিঘ্নিত হয়।
টোপনিৰ অভাৱৰ ফলত শৰীৰত ষ্ট্ৰেছ হৰম’ন (কৰ্টিছল)ৰ মাত্ৰা বৃদ্ধি পায়, যাৰ বাবে মনত অস্থিৰতা, ভয় আৰু উদ্বেগৰ সৃষ্টি হয়। কেতিয়াবা ই পেনিক এটেকৰ দৰে গুৰুতৰ অৱস্থাৰো সৃষ্টি কৰিব পাৰে। দীৰ্ঘদিন ধৰি টোপনিৰ সমস্যা থাকিলে মেজাজৰ পৰিৱৰ্তন, খিংখিঙীয়া, মনোযোগৰ অভাৱ আৰু সিদ্ধান্ত গ্ৰহণৰ অসুবিধাৰ দৰে সমস্যা বৃদ্ধি পায়। বিশেষজ্ঞৰ মতে টোপনিৰ অভাৱে হতাশাৰ আশংকা বৃদ্ধি কৰে আৰু স্মৃতিশক্তি দুৰ্বল কৰি মানুহক মানসিকভাৱে বিচলিত কৰে। গভীৰ নিশালৈ মোবাইল ব্যৱহাৰ, অত্যধিক কামৰ চাপ বা চিন্তা আদিৰ কাৰণে টোপনিৰ মানদণ্ড নষ্ট হৈছে, যিয়ে এই সমস্যাসমূহক আৰু জটিল কৰি তুলিছে।
মানসিক স্বাস্থ্যৰ উন্নতিৰ বাবে ভাল টোপনিৰ অভ্যাস গঢ়ি তোলাটো অতি জৰুৰী। বিশেষজ্ঞৰ পৰামৰ্শ অনুসৰি, প্ৰতিদিন একে সময়ত শুই উঠাৰ অভ্যাস গঢ়িব লাগে। শুই উঠাৰ আগতে মোবাইল বা টিভিৰ ব্যৱহাৰ কমাই দিয়ক, গধুৰ খাদ্য বা কেফেইন গ্ৰহণৰ পৰা বিৰত থকা উচিত। কোঠাটো শান্ত, শীতল আৰু আন্ধাৰ কৰি ৰখিব লাগে। ইয়াৰ উপৰিও শুই উঠাৰ আগতে কোমল সংগীত শুনা, কিতাপ পঢ়া বা ধ্যান কৰাটোৱে টোপনিৰ মান উন্নত কৰাত সহায় কৰে। নিয়মিত ভাল টোপনিয়ে কেৱল মানসিক স্বাস্থ্যৰ উন্নতিয়েই নহয়, হতাশা আৰু উদ্বেগৰ দৰে সমস্যাৰ প্ৰতিৰোধতো গুৰুত্বপূৰ্ণ ভূমিকা পালন কৰে।
