ক’ৰ’ণাতংকৰ মাজতে ৰাজ্যক জোকাৰি যোৱা কলাইগাওঁৰ হাইস্কুল শিক্ষয়িত্ৰী নয়নতৰা চহৰীয়াৰ হত্যাৰ ঘটনাই নতুন মোৰ লৈছে।
৬ জুলাইৰ দিনা প্ৰাতঃ ভ্ৰমণ কৰিবলৈ ওলাই যোৱাৰ পিছৰে পৰা সন্ধানহীন হৈ থকা ৫৩ বছৰীয়া নয়নতৰা চহৰীয়াৰ মৃতদেহ উদ্ধাৰ হৈছিল পিছ দিনা কলাইগাওঁৰ ইউ এন একাডেমীৰ এটা কোঠাৰ ভিতৰত। অৰ্দ্ধ নগ্ন অৱস্থাত উদ্ধাৰ হোৱা শিক্ষয়িত্ৰী গৰাকীৰ মুখ মণ্ডল চিনিব নোৱাৰাকৈ এচিড ঢালি জ্বলাই দিয়া হৈছিল।
প্ৰথম দৃষ্টিত শিক্ষয়িত্ৰী গৰাকীক বলাৎকাৰ কৰি হত্যা কৰা হৈছিল বুলি ভবা হৈছিল যদিও মৰণোত্তৰ পৰীক্ষাত শিক্ষয়িত্ৰী গৰাকীক বলাৎকাৰ কৰাৰ প্ৰমাণ পোৱা হোৱা নাছিল।
ৰাজ্য জোকাৰি যোৱা ঘটনাটোক লৈ মুখ্যমন্ত্ৰী সৰ্বানন্দ সোণোৱালেও উদ্বেগ ব্যক্ত কৰি চি আই ডিক ঘটনাটোৰ তদন্ত কৰিবলৈ নিৰ্দেশ দিছিল।
চি আই ডিয়ে ওদালগুৰি আৰক্ষীৰ সহযোগত ঘটনাটোৰ তদন্ত চলাই শিক্ষয়িত্ৰী নয়নতৰা চহৰীয়াৰ হত্যাৰ ঘটনাত শিক্ষয়িত্ৰী গৰাকীৰ স্বামী উপেন বৰুৱা, জ্যেষ্ঠ পুত্ৰ হিৰক জ্যোতি বৰুৱা, ঘৰৰ কাম কৰা মহিলা যশোদা ৰাভা আৰু আন এজন সন্দেহযুক্ত লোক নেৱাজ আহমেদক গ্ৰেপ্তাৰ কৰে।
ওদালগুৰি ন্যায়িক দণ্ডাধীশৰ আদালতে চাৰিওজন অভিযুক্তক ৭ দিনৰ আৰক্ষীৰ জিম্মাত দিয়ে।
সন্দেহ কৰা অনুসৰি শিক্ষয়িত্ৰী নয়নতৰা চহৰীয়াৰ স্বামী উপেন বৰুৱাৰ আন মহিলাৰ সৈতে পৰকীয়া সম্পৰ্ক আছে আৰু ইয়াৰ প্ৰতিবাদ কৰাৰ বাবেই নয়নতৰা চহৰীয়াক হত্যা কৰা হ’ল।
আৰক্ষীৰ তদন্তত সকলো কথা শীঘ্ৰে পোহৰলৈ আহিব।
