বিহাৰৰ প্ৰাক্তন মুখ্যমন্ত্ৰী তথা আৰজেডি-ৰ মুৰব্বী লালু প্ৰসাদ যাদৱ পুনৰ অসুস্থ হৈ পৰিছে। বয়োজেষ্ঠ ৰাজনীতিবিদ গৰাকী যোৱা দেওবাৰে পাটনাস্থিত নিজ বাসস্থানত অসাৱধানৱশত পৰি যোৱাৰ পিছত আঘাতপ্ৰাপ্ত হৈছিল।
লালু প্ৰসাদ যাদৱ দেওবাৰে পাটনাৰ ১০ চাৰ্কুলাৰ ৰোডত থকা তেওঁৰ বাসগৃহত চিৰিৰ পৰা বাগৰি পৰিছিল। ইয়াৰ পিছতে তেওঁক তাৎক্ষণিকভাৱে এখন মহানগৰ চিকিৎসালয়লৈ লৈ যোৱা হৈছিল।
চিকিৎসালয়ত প্ৰাথমিক চিকিৎসা পৰীক্ষাৰ পিছত সোঁ কান্ধ ভাঙি যোৱা বুলি নিশ্চিত হয়। ৭৪ বছৰীয়া জেষ্ঠ ৰাজনীতিবিদ গৰাকীৰ অৱস্থা বৰ্তমান অৱশ্যে স্থিৰ বুলি জানিব পৰা গৈছে।
আৰজেডি এজন জ্যেষ্ঠ নেতাই সংবাদ মাধ্যমৰ আগত প্ৰকাশ কৰা মতে লালু যাদৱ বৰ্তমানেও চিকিৎসাধীন হৈ আছে যদিও তেওঁ এতিয়া সুস্থ অৱস্থাত আছে। কেইবাগৰাকীও চিকিৎসকে তেওঁক নিৰীক্ষণ কৰি আছে বুলি দলীয় নেতাগৰাকীয়ে লগতে উল্লেখ কৰে।
অৱশ্য সম্প্ৰতি স্বাস্থ্যৰ অৱস্থা সন্তোষজনক বুলি উল্লেখ কৰিলেও উন্নত চিকিৎসাৰ বাবে কিছুসময় পিছত লালু প্ৰসাদ যাদৱক এয়াৰ এম্বুলেঞ্চেৰে দিল্লী এইমছলৈ স্থানান্তৰিত কৰা হ’ব বুলি জানিব পৰা গৈছে।
আনহাতে প্ৰধানমন্ত্ৰী নৰেন্দ্ৰ মোদীয়ে আজি লালুৰ পুত্ৰ তেজস্বী যাদৱৰ পৰা ফোন যোগে লালু প্ৰসাদ যাদৱৰ স্বাস্থ্যৰ বুজ লয়।
আৰজেডিৰ মুখপাত্ৰ চিতাৰঞ্জন গগনে সংবাদ মাধ্যমৰ আগত উল্লেখ কৰা মতে প্ৰধানমন্ত্ৰীয়ে তেজস্বী যাদৱৰ সৈতে কথা পাতি লালু যাদৱৰ স্বাস্থ্যৰ বুজ লয় আৰু আৰজেডি প্ৰধানৰ আশু আৰোগ্য কামনা কৰে।
উল্লেখ্য যোৱা মাৰ্চ মাহতো লালু প্ৰসাদ যাদৱৰ স্বাস্থ্যৰ অৱনতি ঘটিছিল। শৰীৰত ক্ৰিয়েটিনিন স্তৰ বৃদ্ধি হোৱাৰ পিছত লালু প্ৰসাদ যাদৱ শাৰিৰীকভাৱে যথেষ্ট অসুস্থ হৈ পৰিছিল।
গুৰুতৰভাৱে অসুস্থ পৰাৰ পিছত লালু প্ৰসাদ যাদৱক এয়াৰ এম্বুলেঞ্চেৰে দিল্লী এইমছলৈ স্থানান্তৰিত কৰা হৈছিল।
