এইখন ভাৰততে সংঘটিত হৈছে আচৰিত ঘটনা। বিহাৰৰ দিলীপ ঠাকুৰ নামৰ এজন ব্যক্তিয়ে কাগজত পিতৃক মৃত বুলি দেখুৱাই মাত্ৰ ২ লাখ টকাত পূৰ্বপুৰুষৰ মাটি বিক্ৰী কৰিছে। ইয়াৰ বিৰুদ্ধে ৯০ বছৰীয়া ৰাজনাৰায়ণ ঠাকুৰ হাতত লাঠি লৈ মুজাফ্ফৰপুৰ জিলা দণ্ডাধীশৰ দ্বাৰস্থ হয়।
মুজাফ্ফৰপুৰ জিলাৰ মহম্মদপুৰ গাঁৱৰ ৰাজনাৰায়ণ ঠাকুৰে কয় যে তেওঁলোকৰ পূৰ্বপুৰুষৰ মাটিৰ মালিকীস্বত্ব এতিয়াও তেওঁলোকৰ পিতৃ মথুৰা ঠাকুৰৰ নামত আছে। যদিও ভাতৃ ৰামজিনীশ আৰু ৰামপুকৰৰ সৈতে মাটি ভাগ কৰাৰ কথা মৌখিকভাৱে চৰ্চা হৈছে, তথাপিও এতিয়ালৈকে কোনো আইনী বিভাজন হোৱা নাই।
কিন্তু ইয়াৰ মাজতে পঞ্চম পুত্ৰ দিলীপ ঠাকুৰে মাটিখিনি কেনেকৈ বিক্ৰী কৰিলে? বৃদ্ধ পিতৃৰ অভিযোগ যে মাটিৰ কোনো পৰীক্ষণ অবিহনে মতিপুৰ পঞ্জীয়ন কাৰ্যালয়ত মাটি বিক্ৰীৰ নথি প্ৰস্তুত কৰা হৈছে। বিক্ৰী ডীডত ৰাজনাৰায়ণক মৃত বুলি উল্লেখ আছে।
তেওঁ কয় যে দিলীপ ঠাকুৰৰ বয়স ৪৪ বছৰ আৰু তেওঁ সেই মাটিখিনি সুমন সৌৰভ নামৰ এজন ব্যক্তিক বিক্ৰী কৰি দিছিল। তেওঁৰ হাতত থকা বিক্ৰীৰ চুক্তি অনুসৰি তেওঁৰ অজ্ঞাতে আৰু অনুমতি অবিহনে চুক্তিখন সম্পূৰ্ণ কৰা হৈছে। ফলত তেওঁৰ মানসিক আৰু আৰ্থিক ক্ষতি হৈছে।
অভিযোগত ৰাজনাৰায়ণ ঠাকুৰে উল্লেখ কৰিছে – “এই মাটি বিক্ৰী সম্পূৰ্ণ অবৈধ, মোৰ অনুমতি অবিহনে কৰা হৈছে। মই জীয়াই থকাৰ পাছতো মোক মৃত বুলি দেখুৱাই এই প্ৰৱঞ্চনা সংঘটিত হৈছিল।”
তেওঁ প্ৰশাসনৰ ওচৰত দুটা দাবী উত্থাপন কৰে- প্ৰথমতে এই অবৈধ পঞ্জীয়নৰ সম্পূৰ্ণ তদন্ত কৰি দোষীৰ বিৰুদ্ধে আইনী ব্যৱস্থা গ্ৰহণ কৰিব লাগে। দ্বিতীয়তে, তেওঁৰ মাটিৰ যি অংশ ভুৱা কাগজত পঞ্জীয়ন কৰা হৈছিল, সেই অংশ তৎক্ষণাত বাতিল বা জব্দ কৰিব লাগে।
এই সন্দৰ্ভত জিলা দণ্ডাধীশ সুব্ৰত কুমাৰ সেনে ঘটনাটোক গুৰুত্বসহকাৰে লৈ সংশ্লিষ্ট চক্ৰ বিষয়া আৰু থানাক তদন্তৰ নিৰ্দেশ দিছে।
