বুধবাৰে নিশা মণিপুৰৰ নোনি জিলাত হোৱা এক ভয়াৱহ ভূমিস্খলনত ছয়জন লোকৰ মৃত্যু হয়। ভূমিস্খলনত নিহত সকলৰ ভিতৰত টেৰিটৰিয়েল আৰ্মীৰ দুজন কৰ্মীও আছিল। আনহাতে ৬০ জনৰো অধিক লোক ভূমিস্খলনৰ পাছত সন্ধানহীন হৈছে বুলি জানিব পৰা গৈছে।
সন্ধানহীন সকলৰ ভিতৰত স্থানীয় লোকৰ উপৰিও উত্তৰ-পূব সীমান্ত ৰেলৱেৰ কিছু কৰ্মচাৰীও আছে।
এই ভয়াৱহ ভূমিস্খলনত খহি অহা মাটিয়ে মণিপুৰৰ নোনি জিলাৰ মাখুয়াম গাঁৱত ইজেই নদী সম্পূৰ্ণৰূপে বন্ধ কৰি দিয়ে। ইজেই নামৰ এই নদীখন মণিপুৰৰ তামেংলং আৰু নোনি জিলাৰ মাজেৰে বৈ গৈছে।
ভূমিস্খলনৰ পাছত সন্ধানহীন হৈ থকা অধিকাংশ লোক খহি অহা মাটিৰ তলত আৱদ্ধ হৈ থকাৰ সন্দেহ কৰা হৈছে।
এতিয়ালৈকে এনেদৰে মাটিয়ে পুতি পেলোৱা ১২ জন লোকক অনুসন্ধানকাৰী দলে উদ্ধাৰ কৰিছে।
ভাৰতীয় সেনা আৰু অসম ৰাইফলছে যুটীয়াভাৱে উদ্ধাৰ অভিযান আৰম্ভ কৰিছে। অৱশ্যে, বেয়া বতৰে ভূমিস্খলন-পীড়িত এলেকাটোত উদ্ধাৰ অভিযানত বাধাৰ সৃষ্টি কৰিছে।
আনহাতে কেন্দ্ৰীয় গৃহ মন্ত্ৰী অমিত শ্বাহে মণিপুৰৰ মুখ্যমন্ত্ৰী এন বীৰেন সিঙৰ সৈতে ফোনযোগে যোগাযোগ কৰি পৰিস্থিতিৰ বুজ লয়।
Spoke to CM Shri @NBirenSingh and Shri @AshwiniVaishnaw in the wake of a landslide near the Tupul railway station in Manipur. Rescue operations are in full swing. A team of NDRF has already reached the spot and joined the rescue operations. 2 more teams are on their way to Tupul.
— Amit Shah (@AmitShah) June 30, 2022
