অসমৰ চাৰিটা বাওঁপন্থী দল ক্ৰমে চিপিআই(এম), চিপিআই, চিপিআই(এম-এল) আৰু এআইএফবিৰ নেতৃবৃন্দ কালি ১৩ জুনৰ সন্ধিয়া চিপিআই(এম)ৰ ৰাজ্যিক কাৰ্যালয়ত এখন যৌথ সভাত মিলিত হৈ ৰাজ্যখনৰ বৰ্তমান পৰিস্থিতি সন্দৰ্ভত আলোচনা কৰে আৰু আগন্তুক সময়ত জনগণৰ দায়-দাবীবোৰক লৈ ঐক্যবদ্ধ আন্দোলন গঢ়ি তোলাত গুৰুত্ব প্ৰদান কৰে। বাওঁ দলসমূহে উদ্বেগেৰে লক্ষ্য কৰে যে অসমৰ বিজেপি-নেতৃত্বাধীন হিমন্ত বিশ্ব শৰ্মাৰ চৰকাৰখনে অতি সম্প্ৰতি তথাকথিত ‘উন্নয়ন’ৰ নামত ৰাজ্যৰ ঠায়ে ঠায়ে আনকি থলুৱা জনগোষ্ঠীসমূহৰ লোককো নিৰ্মমভাৱে উচ্ছেদ কৰি আদানি-আম্বানীৰ দৰে বৃহৎ পুঁজিপতি আৰু কৰ্পোৰেট গোষ্ঠীৰ স্বাৰ্থত ৰাজ্যৰ প্ৰাকৃতিক সম্পদ লুণ্ঠন আৰু পৰিৱেশ ধ্বংসৰ অভিযান আৰম্ভ কৰিছে। অসম বিধানসভা নিৰ্বাচনৰ দিন চমু চাপি অহাৰ লগে লগে মুখ্যমন্ত্ৰী শৰ্মাৰ নেতৃত্বত ৰাজ্যত উৎকট সাম্প্ৰদায়িক অভিযানকো বৰ্বৰ ৰূপ দিয়া হৈছে। ক্ষমতাৰ খকত ধৰ্মীয় মেৰুবিভাজনৰ লক্ষ্যৰে মুখ্যমন্ত্ৰীয়ে দিনে-নিশাই সাম্প্ৰদায়িক বিষবাষ্প উগাৰি আছে। উন্নয়ন প্ৰসংগত দলসমূহে স্পষ্ট কৰি দিয়ে যে বাওঁ দলসমূহ উন্নয়নবিৰোধী নহয়, কিন্তু জনগণৰ জীৱন-জীৱিকাৰ ওপৰত ক্ৰমবৰ্ধমান আক্ৰমণ, জনগণক ভূমিৰ অধিকাৰৰ পৰা বঞ্চিত আৰু পৰিৱেশ ধ্বংসৰ জৰিয়তে কৰ্পোৰেট লুণ্ঠনৰ স্বাৰ্থত আৰম্ভ কৰা তথাকথিত উন্নয়নৰ বাওঁ দলসমূহ তীব্ৰ বিৰোধী।
চিপিআই(এম)ৰ কেন্দ্ৰীয় কমিটিৰ সদস্য তথা জ্যেষ্ঠ নেতা ইচ্ফাকুৰ ৰহমানৰ সভাপতিত্বত অনুষ্ঠিত বাওঁ দলসমূহৰ সভাখনত চিপিআই(এম)ৰ ৰাজ্যিক সম্পাদক সুপ্ৰকাশ তালুকদাৰ আৰু ৰাজ্যিক সম্পাদকমণ্ডলীৰ সদস্য নিৰংকুশ নাথ, চিপিআইৰ ৰাজ্যিক সম্পাদক কনক গগৈ আৰু নেতা কৃষ্ণ গগৈ, চিপিআই(এম-এল)-লিবাৰেচনৰ ৰাজ্যিক সম্পাদক বিবেক দাস আৰু অন্যতম নেতা পংকজ কুমাৰ দাস, এআইএফবিৰ ৰাজ্যিক নেতা বিষ্ণু বড়ো, গৌতম বৰুৱা আৰু মিলন বৰুৱাই অংশগ্ৰহণ কৰে। সভাৰ আৰম্ভণিতে আহমেদাবাদত যোৱা ১২ জুনৰ দিনা সংঘটিত শোকাৱহ বিমান দুৰ্ঘটনাত গভীৰ শোক প্ৰকাশ আৰু নিহতসকলৰ পৰিয়ালবৰ্গৰ প্ৰতি সমবেদনা জ্ঞাপন কৰা হয়। সভাই পাহাৰীয়া জিলা ডিমা হাছাও আৰু কাৰ্বি আংলঙৰ জনজাতীয় ৰাইজক উচ্ছেদ কৰি হাজাৰ হাজাৰ বিঘা মাটি কৰ্পোৰেটক দিয়াৰ ষড়যন্ত্ৰৰ উপৰি কেৱল কোকৰাঝাৰ জিলাৰ পৰ্বতঝোৰাৰ অন্তৰ্গত বাসবাৰীতে তাপ বিদ্যুৎ প্ৰকল্প নিৰ্মাণৰ বাবে আদানি গ্ৰুপক ৩,৪০০ বিঘা মাটি হস্তান্তৰৰ আঁচনি, কামৰূপ জিলাৰ পলাশবাৰীৰ বৰদুৱাৰ অঞ্চলত ‘চেটেলাইট টাউনশ্বিপ’ৰ নামত বিভিন্ন জনগোষ্ঠীৰ থলুৱা লোকসকলক কৰিব বিচৰা উচ্ছেদ অভিযানৰ প্ৰতিবাদত আন্দোলনৰত সকলো অংশৰ জনগণৰ প্ৰতি সংহতি প্ৰকাশ কৰে। তদুপৰি, সংশ্লিষ্ট ক্ষতিগ্ৰস্ত অঞ্চলসমূহত বাওঁ দলকেইটাৰ প্ৰতিনিধি ভ্ৰমণ কৰি স্থানীয় ৰাইজৰ সৈতে মত বিনিময় কৰিব আৰু অচিৰেই ভূমি ৰক্ষাৰ আন্দোলন তীব্ৰতৰ কৰাৰো পৰিকল্পনা গ্ৰহণ কৰিব।
বাওঁ দলসমূহে আইনৰ শাসন নমনা স্বৈৰাচাৰী, সাম্প্ৰদায়িক, জনগণৰ স্বাৰ্থ জলাঞ্জলি দি বহিৰাগত বৃহৎ বণিয়া তথা কৰ্পোৰেটৰ স্বাৰ্থক অগ্ৰাধিকাৰ দিয়া আৰু পৰিৱেশ ধ্বংসকাৰী বিজেপি দল আৰু চৰকাৰখনক ২০২৬ৰ বিধানসভা নিৰ্বাচনত ক্ষমতাৰ পৰা উৎখাত কৰাৰ লক্ষ্যৰে ৰাজ্যৰ সকলো ধৰ্মনিৰপেক্ষ আৰু গণতান্ত্ৰিক দলৰ মাজত বহল ঐক্য গঢ়ি তোলাৰ বাবে সংশ্লিষ্ট সকলো পক্ষৰ প্ৰতি আহ্বান জনায়।
তদুপৰি, পেলেষ্টাইনৰ গাজাত চলি থকা ইজৰাইলৰ গণহত্যা বন্ধ কৰাৰ লগতে স্বাধীন পেলেষ্টাইন ৰাষ্ট্ৰ গঠনৰ দাবীত অহা ১৭ জুনত সমগ্ৰ দেশত বাওঁ দলসমূহে আহ্বান জনোৱা কাৰ্যসূচীৰ প্ৰতি সঁহাৰি জনাই অসমতো বাওঁ দল কেইটাৰ নেতৃবৃন্দই ৰাজ্যৰ বিভিন্ন স্থানত প্ৰতিবাদ দিৱস পালন কৰাৰ সিদ্ধান্ত লয়। সিদিনা গুৱাহাটীত দিনৰ ১১ বজাত গুৱাহাটী প্ৰেছ ক্লাবত বাওঁ দলসমূহে প্ৰতিবাদ সভা অনুষ্ঠিত কৰাৰ সিদ্ধান্ত গ্ৰহণ কৰে।
