বলীউদৰ কিংবদন্তি অভিনেতা মনোজ কুমাৰৰ দেহাৱসান ঘটিছে। মৃত্যুৰ সময়ত তেওঁৰ বয়স আছিল ৮৭ বছৰ। অভিনেতাগৰাকীয়ে অ’ কৌন থি, ক্ৰান্তিকে ধৰি এলানি জনপ্ৰিয় ছবি উপহাৰ দি থৈ গৈছে।
বিগত কিছুদিন ধৰি মুম্বাইৰ কোকিলাবেন ধীৰুভাই আম্বানী হাস্পতালত ভৰ্তি হৈ আছিল প্ৰবীণ অভিনেতা মনোজ কুমাৰ। তাতেই তেওঁৰ মৃত্যু হয়। তেওঁ হৃদযন্ত্ৰৰ সমস্যাত ভুগি আছিল।
মনোজ কুমাৰৰ লিভাৰ চিৰ’ছিছো হৈছিল। চিকিৎসালয়খনে প্ৰদান কৰা মেডিকেল চাৰ্টিফিকেটত এই দুটা কাৰণতে অভিনেতাজনৰ মৃত্যু হোৱা বুলি উল্লেখ আছে।
মনোজ কুমাৰৰ জন্ম হৈছিল ১৯৩৭ চনত বৰ্তমানৰ পাকিস্তানৰ পূৰ্বে এবটাবাদ নামেৰে জনাজাত খাইবাৰ পখতুনখোৱাত। তেওঁৰ প্ৰকৃত নাম আছিল হৰিকৃষ্ণন গোস্বামী।
১৯৫৭ চনত মাত্ৰ ২০ বছৰ বয়সতে তেওঁ এখন ফেশ্বন ছবিৰ জৰিয়তে বলীউডত প্ৰৱেশ কৰে। তাৰ পিছত ১৯৬১ চনৰ কাচ কি গুৰিয়া ছবিৰ জৰিয়তে তেওঁ জনপ্ৰিয়তা লাভ কৰে। সেইটোৱেই আছিল তেওঁৰ প্ৰথম ডাঙৰ প্ৰাপ্তি।
ইয়াৰ পিছত তেওঁ কেতিয়াও পিছলৈ ঘূৰি চাবলগীয়া হোৱ নাছিল। তেওঁৰ ছবি গুমনাম ১৯৬৫ চনৰ সৰ্বাধিক উপাৰ্জন কৰা ছবি। এই থ্ৰিলাৰখনে সেই সময়তে ২.৬ কোটি টকাৰ ব্যৱসায় কৰিছিল।
মনোজ কুমাৰে কেইবাখনো দেশপ্ৰেমমূলক ছবি, যেনে- ক্ৰান্তি, পূৰব ও পশ্চিম, শ্বহিদ ইত্যাদিত কাম কৰি ৰুটি কপৰা ঔৰ মকান, অ’ কৌন থি-কে ধৰি কেইবাখনো হিট ছবি আগবঢ়াইছে।
তেওঁ ফিল্মফেয়াৰকে ধৰি কেইবাটাও বঁটা লাভ কৰিছে। ১৯৯২ চনত পদ্মশ্ৰী সন্মানেৰে সন্মানিত হোৱা মনোজ কুমাৰ দেশপ্ৰেমমূলক ছবিৰ বাবে ‘ভাৰত কুমাৰ’ নামেৰেও পৰিচিত হৈছিল।
কেৱল অভিনয়ৰ জগতখনতেই নহয়, মনোজ কুমাৰে ৰাজনীতিৰ ক্ষেত্ৰখনতো ভৰি দিছিল। বিজেপিত যোগদান কৰিছিল। কেন্দ্ৰীয় মন্ত্ৰী ৰাজনাথ সিঙে তেওঁৰ মৃত্যুত শোক প্ৰকাশ কৰিছে।
