কেৰালাৰ ৱায়নাড হৈ পৰিছে ‘মৃত্যুপুৰী’। ভূমিস্খলন আৰু ধাৰাসাৰ বৰষুণৰ ফলত মৃত্যু হোৱা লোকৰ সংখ্যা ইতিমধ্যে ৩০০ অতিক্ৰম কৰিছে। ক্ষতিগ্ৰস্ত অঞ্চলত সেনা, এন ডি আৰ এফ, ক’ষ্ট গাৰ্ড আৰু নৌসেনাই যৌথভাৱে অনুসন্ধান অভিযান আৰম্ভ কৰে। জোৰদাৰভাৱে চলি আছে উদ্ধাৰৰ কাম। আৰু ভাৰতীয় সেনাৰ এই প্ৰচেষ্টাৰ দ্বাৰা অনুপ্ৰাণিত হৈছিল তৃতীয় শ্ৰেণীৰ এটি শিশুৱে সেনাবাহিনীলৈ এখন চিঠি লিখিছিল।
সমগ্ৰ ৱায়নাডত ভাৰতীয় সেনাৰ কমেও ৫০০ জোৱানে উদ্ধাৰ অভিযান চলাই আছে। আৰু তেওঁলোকক দেখাৰ পাছত কেৰালাৰ এজন সৰু ল’ৰাই ইতিমধ্যে সেনাবাহিনীত যোগদানৰ সপোন দেখিবলৈ আৰম্ভ কৰিছে। তৃতীয় শ্ৰেণীৰ ছাত্ৰ ৰিয়ানে ভাৰতীয় সেনাবাহিনীলৈ এখন চুটি চিঠি লিখিলে। তেওঁ কয়, ভাৰতীয় সেনাৰ কাম-কাজত মই আপ্লুত হৈছোঁ। ধ্বংসাৱশেষত আবদ্ধ হৈ থকা মানুহক কেনেকৈ বচায়। মইও দেখিছিলো তেওঁলোকে কেৱল বিস্কুট খাই গোটেই দলং এখন সাজিছে। মইও ডাঙৰ হৈ ভাৰতীয় সেনাবাহিনীত যোগদান কৰিব বিচাৰো। মইও তেওঁলোকৰ দৰে দেশৰ সেৱা কৰিম।”
ৰিয়ানৰ ফটো আৰু তেওঁৰ হাতে লিখা চিঠিখন সেনাই ছ’চিয়েল মিডিয়াত শ্বেয়াৰ কৰে। তেওঁলোকে ৰিয়ানক ‘সৰু যোদ্ধা’ বুলি কয়। সেনাবাহিনীৰ মতে, এতিয়াৰ পৰা তেওঁলোকে সেই দিনটোলৈ অপেক্ষা কৰিব যেতিয়া ৰিয়ানে তেওঁলোকৰ ইউনিফৰ্ম পিন্ধিব। একে সময়তে তেওঁলোকে এইটোও কয় যে ৰিয়ানৰ চিঠিখনে তেওঁলোকৰ মনোবল বহু পৰিমাণে বৃদ্ধি কৰিলে আৰু তেওঁলোকক উৎসাহিত কৰিলে।
কাকতলীয়াকৈ ক’বলৈ গ’লে ৱায়নাড জিলাৰ চুৰালমালা আৰু মুণ্ডাক্কাইৰ ভাঙনত মৃত্যুৰ সংখ্যা ৩৩৩লৈ বৃদ্ধি পাইছে। এতিয়াও সন্ধানহীন হৈ আছে ২৮১জন লোক। ইতিমধ্যে ৰাজ্যৰ মুখ্যমন্ত্ৰী পিনাৰায়ী বিজয়নে মুণ্ডাক্কাই আৰু চুৰামালাত নিৰুদ্দেশ হোৱা কোনো এজন ব্যক্তি জীয়াই নথকাৰ আশংকা প্ৰকাশ কৰিছে। যদিও সেনাই নিৰুদ্দেশসকলক উদ্ধাৰ কৰি যোগাযোগ ব্যৱস্থা স্বাভাৱিক কৰাৰ চেষ্টা চলাইছে।
চোৱাচিতামূলক ড্ৰ’নৰ উপৰিও সেনাই ৰাষ্ট্ৰীয় কাৰিকৰী গৱেষণা সংস্থাৰ উন্নত সঁজুলি আৰু প্ৰযুক্তি কেন্দ্ৰটোলৈ প্ৰেৰণ কৰিছে। ইয়াৰ ভিতৰত আছে এন টি আৰ অ’ৰ ৰেকো ৰেচকিউ চিষ্টেম আৰু ৰিম’ট চেন্সিং ইকুইপমেণ্ট। দৰাচলতে প্ৰতিকূল বতৰৰ বিৰুদ্ধে যুঁজি উদ্ধাৰ অভিযান চলোৱাটো তেওঁলোকৰ বাবে কঠিন হৈ পৰিছে।
